апостол Филипп

Акафист святому апостолу Филиппу

Акафист святому апостолу Филиппу
5 (100%) 5 голос.

Оглавление:


Кондак 1

Избранный Христом Богом Спасителем мира к апостольскому служению, преславный апостоле Филиппе! Прославляюще призвавшего тя Господа, похвальныя песни воспеваем ти. Ты же, верный учениче Христов, яко имеющий велие дерзновение ко Господу, не престай поминати нас у престола Вседержителя, да мы, восхваляюще труды подвиги и страдания твоя с любовию вопием ти:
Радуйся Филиппе, святый апостоле Христов и молитвенниче о нас неусыпный.

Икос 1

Ангелов и горних воинств Владыка и Царь, смирив Себе и сошед на землю на спасение наше, призва тя, святый Филиппе в купе с Петром и Андреем от града Вифсаиды в звание апостольства. Ты же, услышав блаженный глас Христа «Гряди по Мне» (Ин. 1:43), всем сердцем последовал за Божественным Учителем твоим. Сего ради вопием ти сице:
Радуйся, града Вифсаиды прозябение славное.
Радуйся, родителей благочестивых отрасле пречестная.
Радуйся, из млада Священному Писанию и книжной премудрости наученный.
Радуйся, проповеданного пророками Мессию Спасителя мира видети желавый.
Радуйся, призвавшего тя Иисуса Христа всем сердцем возлюбивый.
Радуйся, яко за Божественным Учителем твоим последовал еси.
Радуйся, яко родителей, ближних и вся ради Него оставивый.
Радуйся, вечныя небесныя блага от Христа Бога обретый.
Радуйся Филиппе, святый апостоле Христов и молитвенниче о нас неусыпный.

Кондак 2

Обогащаяся обильно Божией благодатию от Христа Спасителя, возжелал еси, всехвальне апостоле, да и иныя будут причастницы сея благодати, сретил еси искренняго друга твоего Нафанаила и с радостию возвестил ему: «Егоже писа Моисей в Законе и пророцы, обретохом Иисуса, сына Иосифова, иже от Назарета» (Ин. 1:45), Ему же вся силы небесныя велегласно поют: Аллилуия.

Икос 2

Препобедив неверие сумнительное по глаголу твоему святе Филиппе тече Нафанаил ко Иисусу, егоже виде Господь рече: «се истинно израилитянин, в немже льсти несть» (Ин. 1:47), и уведев, яко прежде под смоковницею виден был еси Христом, во изумлении воскликнул Ему: «Равви! Ты еси Сын Божий, Ты еси Царь Израилев!» (Ин. 1:49). Исповедуя и мы Христа Сыном Божиим, тебе, святый апостоле, восписуем таковая:
Радуйся, сокровище безценное Христа Бога обретый.
Радуйся, обретением сим обрадованный светло.
Радуйся, к Сокровищу сему искренняго друга твоего приведый.
Радуйся, яко чрез тебе призва Господь Нафанаила в жребий апостольства.
Радуйся, сокровище учения Христова всему миру неоскудно источаяй.
Радуйся, благою вестию о пришествии в мир Искупителя сердца наша возвеселяяй.
Радуйся, маловерие и сумнения в вере из сердец наших изгоняяй.
Радуйся, в твердом исповедании имени Христова и крепком стоянии в вере истинней нас укрепляяй.
Радуйся Филиппе, святый апостоле Христов и молитвенниче о нас неусыпный.

Кондак 3

Проповедуя Господь в пустыни пяти тысящам людем, вопрошаше тя, апостоле Филиппе: «чим купим хлебы, да ядят сии?» (Ин. 6:5-6), Сам ведая, что желаше сотворити. Ты же, святый апостоле, человеколюбие показуя, рекл еси с прочими ученики Ему: «отпусти народы, да шедше во окрестных селех и весех купят себе хлебы» (Мк. 6:5-6) Егда же узрел велие чудо насыщения толиких людей пятию хлебами, познал еси Божественного Учителя твоего не токмо Человека совершенна, но и Бога истинного в нашу немощную плоть облекшегося и в радости воспел Ему: Аллилуия.

Икос 3

Посылая тя, святый апостоле Филиппе Господь с прочими ученики Своими по два во грады и веси с проповедию Евангелия пред лицем Своим, даде и тебе власть бесы изгоняти, болящия исцеляти, прокаженныя очищати и мертвыя воскрешати. Ты же возвратившись от проповеди с прочими соратники твоими в радости вопиял Христу: «Господи, и беси повинуются нам о имене Твоем!» (Лк. 10:17). Мы же восхваляя труды твоя и проповедания, воспеваем тебе тако:
Радуйся, в сонм двенадесяти апостолов сопричтенный.
Радуйся, силу Божию от Христа Бога получивый.
Радуйся, тою силою всякия болезни исцеляяй.
Радуйся, тою силою прокаженныя очищаяй.
Радуйся, тою силою мертвыя восставляяй.
Радуйся, тою силою духи темныя из людей изгоняяй.
Радуйся, яко и беси повинуются ти.
Радуйся, яко по слову Господа имя твое на небеси написано есть.
Радуйся Филиппе, святый апостоле Христов и молитвенниче о нас неусыпный.

Кондак 4

Егда же прежде шести дней Пасхи Христос Бог восхождаше во Иерусалим на жребяти осли седяй, тогда и ты, святе Филиппе, исполнился неизреченной радости, видя Учителя и Господа твоего грядущего победить ад и смерть и с прочими ученики и народы постилал ваия финик и восклицал Ему: «осанна! Благословен грядый во имя Господне!» (Ин. 12:13). Научи и нас славне проповедниче Евангелия, Царю веков, свободившему нас от работы вражия победно воспевати: Алиилуия!

Икос 4

Пришедше во Иерусалим от многих стран еллины, умоляху тя святый апостоле: «господи, хощем Иисуса видети» (Ин. 12:21). Ты же возрадовался о сем, яко и язычницы возжелаху прикоснутися свету истины, и вкупе со апостолом Андреем возвестил Христу желание еллинов. Господь же рече: «аще зерно пшенично пад на земли не умрет, то едино пребывает, аще же умрет, мног плод сотворит» (Ин. 12:21) – сими словесы веру языков по Его славном страдании, смерти и воскресении прознаменуя. Тебе же, святый апостоле, много для распространения сей спасительной веры потрудившемуся, глаголем сице:
Радуйся, пророчество Христа о вере языков един от первых приявый.
Радуйся, проповедию твоею пророчеству сему сбытися пособствовавый.
Радуйся, проповедию твоею о Христе яко пресветлым светилом языком в нощи идолобесия седящим светивый.
Радуйся, словесы и чудесы твоими им путь к вечной жизни указавый.
Радуйся, яко благою вестию о Христе сердца многих людей возвеселивый.
Радуйся, яко деянии, путешествии и труды твоими крепкую любовь твою ко Христу Богу явивый.
Радуйся, яко проповедию твоею имя Христово от многих язык прославляется.
Радуйся, яко житие твое, многих трудов на ниве Христовой исполненное по всей Церкви восхваляется.
Радуйся Филиппе, святый апостоле Христов и молитвенниче о нас неусыпный.

Кондак 5

Прежде Своея страсти Христос Бог на Вечери умыв ноги учеников Своих, образ нам смирения показуя. Ты же, преславне Филиппе, видя велию кротость и смирение Учителя и Господа твоего, сам великаго смирения исполнился еси и во умилении с прочими апостолы вопиял Ему: Аллилуия.

Икос 5

Напитав Христос на Вечери ученики Своя Телом и Кровию Своею, глагола об исходе Своем ко Отцу. Ты же, святый апостоле, един дерзнул еси вопросити Господа о великой тайне Божества, глаголя: «Господи, покажи нам Отца, и довлеет нам» (Ин. 14:8), и слышиши кроткий упрек Учителя твоего: «толико время с вами есмь, и не познал еси Мене Филиппе, видевый Мене, виде Отца, и како ты глаголеши: «покажи нам Отца…» (Ин. 14:9-11). Мы же пред неисследимой тайной Пресвятой Троицы благоговейным молчанием объяти бывше, тебе, святый апостоле вси тако рцем:
Радуйся, Христа Бога о велией тайне Божества вопросивый.
Радуйся, вопрошением сиим велию пользу Церкви принесый.
Радуйся, познавать единосущие лиц Святой Троицы нас научивый.
Радуйся, уста еретиков, отвергающих единосущие Сына со Отцем заградивый.
Радуйся, православно богословствующих и проповедников Евангелия благий покровителю.
Радуйся, ересей и прочих суемудрий лукавых усердный искоренителю.
Радуйся, твердо стоящих за веру православную добрый укрепителю.
Радуйся, брань ведущих во имя Христово с миром, плотию и диаволом славный споборителю.
Радуйся Филиппе, святый апостоле Христов и молитвенниче о нас неусыпный.

Кондак 6

Воскресе Христос, явися учеником Своим дверем затворенным и глагола им: «Мир вам!» (Ин. 20:19). Ты же, святый апостоле Филиппе, с прочими ученики узрев Спасителя из мертвых восставша, радости исполнился еси, твердо уверившись, яко Учитель Твой не человек смертен, но Бог совершенен, имеяй власть жизни вечныя. И послежде проповедуя народом Воскресение Христово, вся языки научил еси пети Победителю ада и смерти: Аллилуия!

Икос 6

По Вознесении Христовом в день Пятидесятницы, сошедшу Духу Святому, ты, славне апостоле, с прочими ученики и Материю Иисусовою исполнился благодати Утешителя, многия славныя дарования от Него приим для проповедания Евангелия Христова, и получив жребий на проповедь во страны Асийския и Сирийския, понесл еси слово Божие, языком во мраке неведения пребывающим. Сего ради благодарнии людие, от тьмы к свету тобою обратившеся, взывают тебе тако:
Радуйся, Воскресением Христовым обрадованный светло.
Радуйся, радость Воскресения Христова, якоже залога нашего восстаня из мертвых всему миру возвестивый.
Радуйся, Вознесение Господа с прочими апостолы на горе Елеонстей узревый.
Радуйся, обетованием Учителя твоего о пребывании с верными до скончания века утешенный.
Радуйся, яко сошедшего во огни Святаго Духа в Сионстей горнице со всеми приявый.
Радуйся, яко многия дары от Утешителя Духа получивый.
Радуйся, яко дары сии достойно сохранивый и преумноживый.
Радуйся, яко дарами сиими много Церкви Христовой послуживый.
Радуйся Филиппе, святый апостоле Христов и молитвенниче о нас неусыпный.

Кондак 7

Проходя по странам и градом с проповедию Евангелия, святе Филиппе, многия претерпел еси гонения и биения от иудей жестоковыйных и языков, во окаменении сердечнем пребывающих, и душевною слепотою об’ятых, не желаху последовати пути Божию, дабы во умилении сердца вкупе с нами пети Христу Богу: Аллилуия!

Икос 7

Егда же предстал еси судилищу архиереову, славне Филиппе, безбоязненно проповедал Христа Бога во услышание всех. Егда же восхоте беззаконный архиерей с прочими погубити тя, внезапу поражены бысть от Бога слепотою, тогда же земля поколебася, людие же ужасом объяти бывше, познали велию силу Христову. Ты бо, человеколюбиве апостоле, молитвою твоею врагов твоих исцелил еси, но ослепленный злобою архиерей неисправлен пребысть, хулы на Христа Бога глаголя, и внезапу, якоже древле Дафан и Авирон, землею пожерт бысть. Народ дже видя сия, крещения от тебе прося, прославил проповедуемого тобою Сына Божия, тебе же глаголя тако:
Радуйся, многократно за проповедь Евангелия страдания приявый.
Радуйся, многажды Христом Богом от смерти исхищенный.
Радуйся, об окаменении сердечнем и слепоте душевней в людех пребывающих много скорбевый.
Радуйся, чудесы твоими, силою Божией соверенными, слово, тобою проповеданное утвердивый.
Радуйся, чудесы твоими, языков из неверия в веру Христову обращаяй.
Радуйся, к незлобию и человеколюбию нас подвизаяй.
Радуйся, прощению и снизхождению к обидящим и ненавидящим нас научаяй.
Радуйся, твердо стояти в вере Православней нам помогаяй.
Радуйся Филиппе, святый апостоле Христов и молитвенниче о нас неусыпный.

Кондак 8

По повелению Ангела Господня, явльшагося тебе, святе Филиппе, исшел еси на путь, ведущий из Иерусалима в Газу, и узрев едущаго в колеснице вельможу Ефиоплянина каженика, бывша во Иерусалиме на поклонении и чтуща пророка Исаию. Ты же, апостоле славне, Духом Божиим водим, пристал еси колеснице сей, Писания ему изъясняя и научая пети того: Аллилуия.

Икос 8

Просвещенный тобою каженик, Филиппе, всем сердцем веру Христову восприял, кркщкния от тебе прося, ты же крестил его. И абие изшед из воды, Дух Святый нападе на каженика, тя же, апостоле, Ангел Господень восхите и не виде тя ктому каженик, идяше в путь свой радуяся. Сего ради мы восписуем тебе таковая:
Радуйся, ревностный слова Божия благовестителю.
Радуйся, людей просвещенных тобою во имя Отца, и Сына и Духа Святаго крестителю.
Радуйся, Божие слово почитающих покровителю.
Радуйся, Священных Писаний и Божественной премудрости нам из’яснителю.
Радуйся, Священными Письмены сердца наша умудряяй.
Радуйся, словесы твоими умы наша просвещаяй.
Радуйся, премудростию твоею суемудрие веко сего посрамляяй.
Радуйся, любовию твоею души наша согреваяй.
Радуйся Филиппе, святый апостоле Христов и молитвенниче о нас неусыпный.

Кондак 9

Проповедуя слово Божие, многия труды, многия путешествия подъял еси, святе апостоле Филиппе. Плывущу ти в корабли, велия буря в нощи постиже тя, яко бывшии с тобою во отчаяние приидоша. Ты же встал на молитву и абие яви ти Господь на небеси светлое знамение Креста Своего, нощь просвещее, и внезапу море умирися, волны умолкоша. Людие же спасение тобою получиша, в благодарности воззваша Богу, тобою их спасшего: Аллилуия!

Икос 9

Витии языческия умолкоша и изнемогоша пред словом твоим, апостоле, егда в некоем граде, проповедуя веру Христову, ты многия болящия исцелил еси, мертвеца, несомого на погребение единем словом воскресил еси. Людие же видяще тобою совершаемая, обращахуся ко Христу от нечестия языческого, идоли своя разбиваху, Крещение от тебе принимая. Мы же во умилении глаголем тебе сицевая:
Радуйся, стихиям морским словом Божиим повелеваяй.
Радуйся, утопающим в море житейском руку помощи простираяй.
Радуйся, молитвою твоею со дна отчаяния подымаяй.
Радуйся, во унынии седящих надеждою на Господа возвеселяяй.
Радуйся, от смерти духовной души наша избавляяй.
Радуйся, от внезапной погибели милосердием Божиим нас сохраняяй.
Радуйся, христианскую кончину, непостыдну, мирну и Святых Таин причастну от Бога нам испрошаяй.
Радуйся, от мытарств горьких, бесов, воздушных князей ходатайством твоим нас избавляяй.
Радуйся Филиппе, святый апостоле Христов и молитвенниче о нас неусыпный.

Кондак 10

Путешествуя из страны в страну, из града во град, сретил еси Филиппе клеврета твоего апостола Варфоломея и сестру твою Мариамну, их же Господь посла тебе в помощь, а послежде и возлюбленнаго ученика Христова Иоанна Богослова и проходя страны Лидийския и Мизийския, многия гонения, темницы и заточения, камнями побиения за проповедь Евангелия претерпевали есте, но силою Божией всегда сохраняеми бяху, служа делу спасения нашего. Сего ради мы, благодаряще за вся Господа, вопием Ему: Аллилуия!

Икос 10

Придя во град Иераполис, славне апостоле Филиппе, ты духом возмутился еси, видя его идолами преисполненный. Ты же желая отвратити людей от идолонечестия и обратити я ко Христу, многия чудесы и исцеления именем Христовым сотворил еси, ехидну, юже почитаху яко бога, сугубою молитвою со Иоанном, аки копием умертвил еси. Мы же благодаряще Бога за труды твоя, тебе воспеваем таковая:
Радуйся, любве Христовой провозвестниче преизрядный.
Радуйся, милосердия Божия к кающимся грешником возвестителю славный.
Радуйся, грехов, пороков и беззаконий людских обличителю нелицеприятный.
Радуйся, покаяния и Царствия Небесного, в силе пришедшаго проповедниче неумолкаемый.
Радуйся, гнева и суда Божия на нераскаянныя грешники и во грсех упорствующия глашатаю грозный.
Радуйся, различными недуги страждущих врачу безмездный.
Радуйся, архангельское благоговение ко Христу, Божественному твоему Учителю стяжавый.
Радуйся, все житие твое проповеданию слова Божия и делу нашего спасения посвятивый.
Радуйся Филиппе, святый апостоле Христов и молитвенниче о нас неусыпный.

Кондак 11

Скончавая житие твое, славне апостоле Филиппе, ты вкупе со апостолом Варфоломеем рапятие крестное претерпел еси, веру и преданность Господу и Учителю твоему показуя, за ны на древе Крестнем руце свои распрострершаго. Научи и нас, святе Филиппе, в твердой вере воспевати Христу Богу: Аллилуия!

Икос 11

Светлый светильник на свещнице Христом возженный, всем просиял еси святе апостоле Филиппе, житием, труды и славною кончиною твоею. При распятии твоем яви Господь трус велий, земля разверзеся живых поглоти грешники. Людие же зряще сих, ужасом объяти бывше, со слезами просиша тя со апостолом Варфоломеем умолити Христа Бога о прощении грех их. Егда же поспешно сняша тя со креста, узреша тя дух твой Господу предавша, ибо бысть произволение Божие по трудех и подвизех твоих взяти тя от земли на небо, иде же все житие твое стопы твоя обращал еси. Мы же почитая страдания твоя и восхваляя кончину твою, глаголем тебе сицевая:
Радуйся, крестною смертию твоею веру и преданность Христу Богу запечатлевый.
Радуйся, подобно Учителю твоему о вразех твоих распинающих тя, моление со креста возносивый.
Радуйся, чрез смерть твою веру в проповеданнаго тобою Господа утвердивый.
Радуйся, крестом аки мостом от земли на небо прешедый.
Радуйся, дух любве и всепрощения нам от Бога испрошаяй.
Радуйся, дух милосердия и сострадания на нас от престола Божия изливаяй.
Радуйся, духом кротости и смирения служению ближних нас научаяй.
Радуйся, духом премудрости и веры на путь правый стопы наша напрвляяй.
Радуйся Филиппе, святый апостоле Христов и молитвенниче о нас неусыпный.

Кондак 12

Святая душа твоя, Филиппе, ко престолу Христа Бога вознесена бысь, Егоже возлюбил еси, Егоже проповедал еси, Егоже ради смерть претпрпел еси, и тамо прииим венец за труды твоя, вкупе с праотцы, пророки и прочими угодившими Спасителю нашему победно возопил: Аллилуия!

Икос 12

Благодать дана бысть месту сему идеже кровь твоя честная истече, славне апостоле. Повеле Господь земли в месте сем в три дни произростити лозу виноградную в дивное знамение святости жития твоего и блаженныя кончины твоея. Ныне же предстоя Святей Троице, поминай нас недостойных, вопиющих ти таковая:
Радуйся, лозо винограда Христова мног плод сотворившая.
Радуйся, древо при источниках вод насажденное листвием своим от зноя греховнаго нас покрывающее.
Радуйся, светильниче пресветлый, светом Евангелия вся просвещаяй.
Радуйся, лучу преславный, Солнце правды Христа Бога во тьме седящим являяй.
Радуйся, источниче сладостный, жаждущих правды Божия обильно напояяй.
Радуйся, ходатойством твоим к Богу Царствие Небесное нам испрошаяй.
Радуйся, яко по слову Учителя твоего имеяй возсести на единем от двунадесяти престолов судяще двунадесять колен израилевых.
Радуйся, яко имя твое на единем от оснований грядущаго града Небеснаго Иерусалима начартано есть.
Радуйся Филиппе, святый апостоле Христов и молитвенниче о нас неусыпный.

Кондак 13

О, святый и преславный апостоле Филиппе, верный учениче и проповедниче Христов! Прими сие малое моление наше и не отвратися от нас грехами погружаемых, но явив присное человеколюбие и милосердие твое умоли о нас Христа Бога, да помиловании им, во Царствие Небеснем, в горнем Иерусалиме воспоем Ему победную песнь: Аллилуия, Аллилуия, Аллилуия! 

(Этот Кондак читается трижды, затем 1 Икос и 1 Кондак)

Икос 1

Ангелов и горних воинств Владыка и Царь, смирив Себе и сошед на землю на спасение наше, призва тя, святый Филиппе в купе с Петром и Андреем от града Вифсаиды в звание апостольства. Ты же, услышав блаженнвй глас Христа «Гряди по Мне» (Ин. 1:43), всем сердцем последовал за Божественным Учителем твоим. Сего ради вопием ти сице:
Радуйся, града Вифсаиды прозябение славное.
Радуйся, родителей благочестивых отрасле пречестная.
Радуйся, из млада Священному Писанию и книжной премудрости наученный.
Радуйся, проповеданного пророками Мессию Спасителя мира видети желавый.
Радуйся, призвавшего тя Иисуса Христа всем сердцем возлюбивый.
Радуйся, яко за Божественным Учителем твоим последовал еси.
Радуйся, яко родителей, ближних и вся ради Него оставивый.
Радуйся, вечныя небесныя блага от Христа Бога обретый.
Радуйся Филиппе, святый апостоле Христов и молитвенниче о нас неусыпный.

Кондак 1

Избранный Христом Богом Спасителем мира к апостольскому служению, преславный апостоле Филиппе! Прославляюще призвавшего тя Господа, похвальныя песни воспеваем ти. Ты же, верный учениче Христов, яко имеющий велие дерзновение ко Господу, не престай поминати нас у престола Вседержителя, да мы, восхваляюще труды подвиги и страдания твоя с любовию вопием ти:
Радуйся Филиппе, святый апостоле Христов и молитвенниче о нас неусыпный.


После акафиста читается молитва:

Молитва апостолу Филиппу

«О, святый и всехвальный провозвестниче Евангелия Христова, славный учениче Христов апостоле Филиппе. Ты проповедуя слово Божие, многия труды, многия петешествия, многия страдания претерпел еси, последи же веру твою крестною смертию запечатлел еси. Ныне же предстоя престолу Учителя твоего и Господа Иисуса Христа, вознеси о нас моление к Нему, да не тща будет в нас искупительная жертва Его, да обратит нас от тьмы греховныя к свету заповедей и на путь правый наставит нас. Умоли Его, святый апостоле, веру Православную в нас до конца дней наших непоколебиму сохранити, Церковь Свою святую непреобориму от ересей и расколов до скончания века утвердити, болящия исцелити, от бесных бесы отгнати и всем нам на всяку потребу полезную милость Свою ниспослати. Да тако мы, в верности Евангельскому учению пребудем и сотворив вся повеленная нам, сподобимся непостыдной, мирной, Святых Таин причастной христианской кончины, и во Царствии Небеснем с тобою и всеми святыми прославим Христа Бога, Ему подобает честь и поклонение вкупе со безначальным Его Отцем и Пресвятым и Благим и Животворящим Его Духом ныне и присно и во веки веков. Аминь.»

Другие молитвы апостолу Филиппу.

Тропарь, глас 3

Благоукрашается вселенная, Ефиопия ликовствует, яко венцем красуема тобою, просветившися светло, торжествует память твою, богоглаголиве Филиппе: вся бо веровати Христу научил еси, и течение совершил достойно Евангелия. Тем дерзновенно варит ефиопская рука к Богу, Егоже моли даровати нам велию милость.

Кондак, глас 8

Ученик и друг Твой, и подражатель страсти Твоея, вселенней Бога Тя проповеда, богоглаголивый Филипп: того молитвами от врагов пребеззаконных церковь Твою, и всяк град Твой, Богородицею соблюди, многомилостиве.

Величание

Величаем тя, апостоле Христов Филиппе, и чтим болезни и труды твоя, имиже трудился еси во благовестии Христове.


Сохранить акафист в социальных сетях:

Добавить комментарий

Ваш e-mail не будет опубликован. Обязательные поля помечены *