Икона Божией Матери "Утоли Моя Печали"

Акафист иконе Божией Матери «Утоли Моя Печали»

4.4/5 - (40 голосов)

(о нуждах, скорбях и печалях)
Оглавление:


Кондак 1

Взбранное нам и дивное избавление даровася, Твой образ честный, Преблагословенная Дево Владычице Богородице, яко избавльшеся от злых явлением его и к нему взирающе, восписуем Ти благодарственная раби Твои, Богородице; но яко имущая державу непобедимую, от всяких нас бед свободи, да зовем Ти:

Радуйся, Радосте наша, избави нас от всякаго зла и утоли наша печали.

Икос 1

Ангел множество и вся Небесная Воинства славят Тебе, Царицу всех Богородицу, Ты же исполнила еси радости души наша милостивым явлением нам образа Твоего святаго, Богоизбранная Дево Владычице, к немуже кланяющеся, Тебе умиленная моления возсылаем, милосердому Твоему к нам заступлению со страхом зовуще таковая:

Радуйся, Отца Безначальнаго благословение; радуйся, Сына Превечнаго жилище.

Радуйся, Духа Святаго пребывание; радуйся, яко Тебе славят многоочитии херувими.

Радуйся, яко Тебе похвальная приносят шестокрилатии серафимы; радуйся, яко Тебе вся небесная воинства величают.

Радуйся, яко Тебе вся колена земная Матерь Божию исповедуют; радуйся, яко Тобою вся вселенная веселия исполняется.

Радуйся, яко Тобою вся болезни наша исцеляются; радуйся, Твоими бо молитвами печали наша утоляются.

Радуйся, Твоими бо ходатайствы вся прошения наша исполняются; радуйся, яко Тебе и Сыну Твоему в Твоей честней иконе благодарно поклоняемся.

Радуйся, Радосте наша, избави нас от всякаго зла и утоли наша печали.

Кондак 2

Видят Тя, Богоизбранная Отроковице, вся небесныя силы предстоящу всегда Престолу Славы Небеснаго Царя и за христианы к Сыну и Богу молящуюся, Небесная Царице; мы же грешнии на земли, зряще Твою святую икону и к ней припадающе, Тебе радостно поклоняемся, зовуще: Аллилуиа.

Икос 2

Разум подаждь нам, Всеусердная Предстательнице наша, Небесная Царице, из уст бо нас скверных, како мощно пети Твоему имени? Яко благих еси нам Ходатаица, сильна еси вспомоществовати во всякой нами требуемой помощи, да Тебе со умилением зовем сице:

Радуйся, молитвы о нас к Сыну и Богу во утешение приносящая; радуйся, Твоими молитвами очи наша от вечнаго рыдания избавляющая.

Радуйся, Твоими Матерними молитвами Сына и Бога на милость к нам приклоняющая; радуйся, Твоими молитвами праведный на нас гнев Божий утоляющая.

Радуйся, Твоими ходатайствы грехи наша прощающая; радуйся, Твоею помощию страсти наша истребляющая.

Радуйся, Твоим предстательством временная наша скорби разрушающая; радуйся, Ты во всяких бедах и нуждах нам помогающая.

Радуйся, Тя славящих всегда прославляющая; радуйся, Твоею радостию печали наша утоляющая.

Радуйся, непрестанное нам веселие подавающая; радуйся, нам райския двери отверзающая.

Радуйся, Радосте наша, избави нас от всякаго зла и утоли наша печали.

Кондак 3

Сила Вышняго осени Тя к скорому и теплому заступлению верно притекающих к Тебе и честному Твоему образу поклоняющихся, единей бо токмо Тебе, нетленней и Пречистей Богоматери, дадеся дар всякое благое наше прошение исполняти, и едина Ты можеши нам помощи, елико хощеши. Тем всяк возраст славословит Сына Твоего и Бога нашего, зовый: Аллилуиа.

Икос 3

Имущи богатство милосердия неоскудное, всем концем земным простираеши руку помощи и подаеши болящим исцеление, страждущим ослабу, слепым прозрение и всем вся по потребе исполняеши. Мы же Тебе благодарно сице поем:

Радуйся, едина Мати, милосердие нам являющая; радуйся, милости сокровище многоценное нам открывающая.

Радуйся, безчисленныя щедроты всем подавающая; радуйся, слово премудрости просящим дарующая.

Радуйся, преспеяние разума юным подавающая; радуйся, раны наша греховныя истребляющая.

Радуйся, праведных в райских селениих насаждающая; радуйся, отчаянным будущих благ Надеждо и Укрепление.

Радуйся, всех падших скоро к благодати возставляющая; радуйся, всем всякую требуемую от Тебе помощь подавающая.

Радуйся, Радосте наша, избави нас от всякаго зла и утоли наша печали.

Кондак 4

Бурею многих бед одержимым нам всегда помогаеши, Небесная Царице, с верою прибегающим к Тебе и поклоняющимся цельбоносней Твоей иконе, ейже первописанней иногда рекла еси: С сим образом благодать Моя и сила. И мы истинно веруем, яко послушаеши прошения призывающих имя святое Твое и Сыну Твоему зовущих: Аллилуиа.

Икос 4

Слыша Господь Твоя на небеси о нас ходатайства, избранная Палато Духа Святаго, исполняет Твоя прошения, мы же грешнии на земли, видевше святую Твою икону, яко светозарное солнце нам светящуюся, Тебе, яко Божией Матери, дерзаем глаголати:

Радуйся, Солнце мысленное нам являющая; радуйся, Светом немерцающим нас просвещающая.

Радуйся, умерщвленных грехами нас оживляющая; радуйся, неплодным матерем ложесна разрешающая.

Радуйся, нечаянно находящих на нас злых врагов скоро прогоняющая; радуйся, желаемых благ всегда нас наслаждающая.

Радуйся, скоро в бедах и в печалех нас утешающая; радуйся, верою имя Твое призывающих от нечаянныя смерти спасающая.

Радуйся, на Тя уповающим безконечный живот дарующая; радуйся, веру и любовь к Тебе имущих к небеси возводящая.

Радуйся, Предстательство наше крепкое; радуйся, во всяких обстоятельствах нас защищающая.

Радуйся, Радосте наша, избави нас от всякаго зла и утоли наша печали.

Кондак 5

Боготечную звезду, честную Твою икону, Ты нам показала еси, Владычице мира, к нейже мы зряще и верою сердечною молящеся, Тебе, Богородице, глаголем: Ты еси нам щит непобедимый и стена необоримая, вопиющим Богу: Аллилуиа.

Икос 5

Видеша силы небесныя на руку Твоею Создавшаго Своима рукама человеки и Владыку разумевающе Его; мы же грешнии на земли, зряще изображенную Тебе, Пречистую Матерь Его, любезно Свои руце к нам простирающую, к Тебе умильно зовем:

Радуйся, на руку Твоею Огнь Божественный неопально держащая, Имже грехи наша попаляются; радуйся, на руку Твоею Света Неприкосновеннаго носившая, Имже души наша просвещаются.

Радуйся, врагов наших видимых и невидимых побеждающая; радуйся, любовь и милосердие к нам являющая.

Радуйся, руце Твои в поручение о нас к Богу приносящая; радуйся, вход в Царствие Небесное нам отверзающая.

Радуйся, Твоею помощию нас защищающая; радуйся, Твоим ходатайством грехи наша прощающая.

Радуйся, Твоим молением печали наша утоляющая; радуйся, яко Твоим предстательством всяких благ наслаждаемся.

Радуйся, яко Тобою вся во благих желания наша исполняются, радуйся, яко волю Сына Твоего творити нас подвизаеши.

Радуйся, Радосте наша, избави нас от всякаго зла и утоли наша печали.

Кондак 6

Проповедницы Богоноснии апостоли, по вознесении Господни, храму Твоему освещаему, невидимою рукою изображенный шаровными подобии на стене обретше образ Твой, Владычице, рожденному от Тебе Богу воспеша: Аллилуиа.

Икос 6

Возсияла еси премудростию от Истиннаго Солнца Правды, Богоизбранная Отроковице, и, лучи истиннаго Богоразумия испущающи, теми освещаеши всех верою исповедающих Тя истинную Матерь Божию быти, вопиющих сице:

Радуйся, всех на небеси славою Твоею просвещающая; радуйся, начало человеческаго спасения устрояющая.

Радуйся, ковчеже жизни нашея, от потопа смертнаго нас сохраняющий; радуйся, в райских селениих жити нам дарующая.

Радуйся, Предстательнице наша к Богу, мир спасающая; радуйся, в бедах сущих скоро заступающая.

Радуйся, всякия болезни человеческия, телесныя и душевныя, исцеляющая; радуйся, немым и косноязычным словеса отверзающая.

Радуйся, всякаго блага просящим у Тебе подательнице; радуйся, учение благодати всем источающая.

Радуйся, тем всякий чин и возраст довольно услаждающая; радуйся, всех благая желания исполняющая.

Радуйся, Радосте наша, избави нас от всякаго зла и утоли наша печали.

Кондак 7

Хотя долготерпеливый Всевидец Господь явити Своего человеколюбия и щедрот бездну, избра Тебе Себе в Матерь, милости неисчерапемый источниче, да аще кто праведным судом Божиим осуждения достоин, Твоим всемощным ходатайством сохранен будет и Сыну Твоему и Богу нашему велегласно зовет: Аллилуиа.

Икос 7

Дивна показал еси дела Твоя в Пречистей Матери Твоей, Господи, и дивну даровал еси нам Ея икону, паче лучей солнечных просвещающую людей, яко Самую зрящих Богородицу и верою сердечною от души любовию вопиющих таковая:

Радуйся, икону Твою на земли, яко облак, всем распростирающая; радуйся, тою паче надеяния милосердое к нам заступление являющая.

Радуйся, Твоею иконою источники чудес всюду источающая; радуйся, явлением Твоея иконы вся люди просвещающая.

Радуйся, тою новое знамение благодати в Церкви являющая; радуйся, яко, на икону Твою взирающе, Самой Тебе, истинней Богородице, поклоняемся.

Радуйся, иконою Твоею, яко столпом огненным, мрак греха отгоняющая; радуйся, тою печали наша утоляющая.

Радуйся, Церковь освятившая тоя явлением; радуйся, яко мы, грешнии, сохраняемся Твоим заступлением.

Радуйся, вретище скорби нашея растерзающая; радуйся, вечною радостию нас одевающая.

Радуйся, Радосте наша, избави нас от всякаго зла и утоли наша печали.

Кондак 8

Странну и преславну в Церкви явльшуюся святую Твою икону ангели воспеша, апостоли прославиша, лик святителей поклонишася, мы же, грешнии, припадающе, ожидаем Твоея великия и богатыя милости, с веселием вопиюще: Аллилуиа.

Икос 8

Всеми вышними и нижними владычествуяй Господь, видев Тя, Матерь Свою, всегда предстоящу Ему и со умилением Ему приносящу моление о нас грешных, обеща исполнити вся прошения Твоя. Мы же, грешнии, надеющеся на Твоя Матерния о нас молитвы, благодарственная Тебе приносим сице:

Радуйся, с Сыном Твоим и Богом вечно царствующая; радуйся, Емуже всегда о нас моления приносящая.

Радуйся, всех к Тебе прибегающих Твоею милостию покрывающая; радуйся, всех Радосте, печали наша утоляющая.

Радуйся, примирение наше с Богом соделавшая; радуйся, Бога и человека соединившая.

Радуйся, спасение человеческое устроившая; радуйся, прародительнаго греха клятву разрушившая.

Радуйся, смертное наше естество безсмертием просветившая; радуйся, жестокость сердца нашего умилившая.

Радуйся, отчаянных к Богу возводящая; радуйся, сосуды смертныя, на нас уготованныя, сокрушившая.

Радуйся, Радосте наша, избави нас от всякаго зла и утоли наша печали.

Кондак 9

Все естество ангельское похвальныя песни приносит Тебе, Божией Матери и Заступнице всех припадающих Тебе и просящих Твоея помощи, яко твердым и крепким Твоим предстательством праведных веселиши, грешных заступаеши и от бед избавляеши, и печали утоляеши, и молишися о всех верою зовущих: Аллилуиа.

Икос 9

Вития многовещаннии, яко рыбы безгласныя, недоумеют хвалити славный, Владычице, иконы Твоея праздник, ниже от скверных устен наших приносимыя Ти похвалы достойны, обаче неисчетная благодеяния, иконою Твоею нам являемая, видевше, душею и сердцем радующеся, Тебе глаголем:

Радуйся, от глада нас Хлебом жизни питающая; радуйся, от губительства смертнаго безсмертием нас соблюдающая.

Радуйся, от труса греховнаго нас сохраняющая; радуйся, от потопа смертнаго рукою Твоею крепкою нас избавляющая.

Радуйся, от огня росою молитв Твоих нас восхищающая; радуйся, от бед сильным Твоим предстательством нас защищающая.

Радуйся, от меча силою Твоею нас охраняющая; радуйся, от нашествия иноплеменник нас спасающая.

Радуйся, от междоусобныя брани истинным миром нас ограждающая; радуйся, от смертоносныя раны прибегающих к Тебе исцеляющая.

Радуйся, от належащаго праведнаго прещения Божия Твоим молением нас свобождающая; радуйся, от всякия нас язвы Твоим честным ходатайством изъимающая.

Радуйся, Радосте наша, избави нас от всякаго зла и утоли наша печали.

Кондак 10

Спасти хотя род человеческий от прелести вражия, Человеколюбец Господь Тебе, Матерь Свою, дарова земным на помощь, глаголя: сынове человечестии, се Мати Моя покров и прибежище вам да будет, печальным утешение, скорбящим радование, обидимым заступница, да всех из глубины греховныя воздвигнет, вопиющих: Аллилуиа.

Икос 10

Царю Небесный, — тако молит за ны всегда Небесная Царица, — приими всякаго человека, славящаго Тя и призывающаго имя Твое, идеже бывает память святому имени Твоему, и прославляющих Мя имене Твоего ради, и не отрини их от лица Твоего, но благоволи в них и приими от них всякое моление, и всех от бед избави. Мы же, грешнии, надеющеся на Твоя Матерния молитвы, зовем сице:

Радуйся, Молитвеннице наша к Богу теплая; радуйся, яко Твоя Матерняя молитва много может, Владыку умилостивляющи.

Радуйся, отчаянных Надеждо, печали их утоляющая; радуйся, Твоею благодатию наше недостоинство осиявающая.

Радуйся, нашу скверну Твоею чистотою очищающая; радуйся, моления наша Твоим благоуханием исправляющая.

Радуйся, брение наше тленное в нетление обращающия; радуйся, неможение наше врачующая.

Радуйся, вся наша болезни душевныя и телесныя исцеляющая; радуйся, нашедший на нас облак страстей, скорбей и печалей скоро разгоняющая.

Радуйся, сильным Твоим прошением вся полезная дарующая; радуйся, пред Престолом Сына Твоего за молящих Ти ся ходатайствующая.

Радуйся, Радосте наша, избави нас от всякаго зла и утоли наша печали.

Кондак 11

Пение всеумиленное приими от нас, Небесная Царице, и молитву, приносимую Тебе, Дево Богородице, услыши, к Тебе бо в напастех, скорбех и печалех прибегаем и пред Тобою в бедах наших слезы проливаем и молим: утоли наша печали и приими сию жертву Твоих рабов, зовущих: Аллилуиа.

Икос 11

Светоприемная свеща истиннаго Света сущим на земли явльшися, души просвещаеши чтущих Твоея иконы явление и к разуму божественному наставляеши поющих Ти сицевая:

Радуйся, свеще неугасимая Огня невещественнаго, нас просвещающая; радуйся, заре незаходимаго Света Божественнаго, нас озаряющая.

Радуйся, Солнце правды нам являющая; радуйся, Источник жизни райския нам источающая.

Радуйся, Мати Света Истиннаго, благочестивых души просвещающая; радуйся, Мати всех Бога, озлобленных всех души утешающая.

Радуйся, Тя на помощь призывающих и имя Твое славящих спасающая; радуйся, уповающим на Тя живота непостыдный конец дарующая.

Радуйся, всем родом, Тя Матерь Божию почитающим и Богородицу именующим, непрестанно помогающая; радуйся, осенением святыя Твоея иконы злых духов мечтания от нас прогоняющая.

Радуйся, во внезапных на нас находящих скорбех и печалех скоро нас утешающая; радуйся, всему миру радость дарующая.

Радуйся, Радосте наша, избави нас от всякаго зла и утоли наша печали.

Кондак 12

Благодать Божественную испроси нам у Небеснаго Владыки, Сына Твоего и Бога, и простри нам руку помощи, и молитвами Твоими утоли наша печали, покрый нас кровом крилу Твоею, отжени от нас всякаго врага и супостата, умири нашу жизнь, да не погибнем люте, но приими нас в вечныя кровы, Покровительнице наша, да, радующеся Тебе, зовем: Аллилуиа.

Икос 12

Поюще Тя, державную Помощницу, хвалим Тя и, молящеся Тебе со умилением, веруем и исповедуем, яко испросиши благая временная и вечная воспевающим Ти:

Радуйся, молитвами Твоими весь мир спасающая; радуйся, всю вселенную ходатайством Твоим заступающая.

Радуйся, православным на варвары победы подавающая; радуйся, нашествия на христианы иноплеменных побеждающая.

Радуйся, в вере благочестивыя сохраняющая; радуйся, не почитающих иконы Твоя святыя, яко прах, от лица земли развевающая.

Радуйся, поклоняющимся иконе Твоей и Тя на помощь призывающим, и в печалех бедствующим скоро помогающая; радуйся, нас грешных ко спасению и восприятию благ вечных наставляющая.

Радуйся, безконечнаго царствия у Сына Твоего и Бога нашего всем нам испрошающая; радуйся, верным безконечную жизнь дарующая.

Радуйся, всем во всякой потребе вся полезная и благая подавающая; радуйся, нетленная стяжати научающая.

Радуйся, Радосте наша, избави нас от всякаго зла и утоли наша печали.

Кондак 13

О Всепетая Мати, Небесная Царице и Владычице, Дево Богородице, рождшая всех святых Святейшее Слово, нынешнее приемши приношение, утоли наша печали и избави нас от всяких напастей, бед, скорбей и вечнаго осуждения и грядущаго изми мучения, и сподоби нас, рабов Твоих, в вечных райских селениях водворитися, зовущих: Аллилуиа.

(Этот кондак читается трижды, затем 1-й икос и 1-й кондак)

Икос 1

Ангел множество и вся Небесная Воинства славят Тебе, Царицу всех Богородицу, Ты же исполнила еси радости души наша милостивым явлением нам образа Твоего святаго, Богоизбранная Дево Владычице, к немуже кланяющеся, Тебе умиленная моления возсылаем, милосердому Твоему к нам заступлению со страхом зовуще таковая:

Радуйся, Отца Безначальнаго благословение; радуйся, Сына Превечнаго жилище.

Радуйся, Духа Святаго пребывание; радуйся, яко Тебе славят многоочитии херувими.

Радуйся, яко Тебе похвальная приносят шестокрилатии серафимы; радуйся, яко Тебе вся небесная воинства величают.

Радуйся, яко Тебе вся колена земная Матерь Божию исповедуют; радуйся, яко Тобою вся вселенная веселия исполняется.

Радуйся, яко Тобою вся болезни наша исцеляются; радуйся, Твоими бо молитвами печали наша утоляются.

Радуйся, Твоими бо ходатайствы вся прошения наша исполняются; радуйся, яко Тебе и Сыну Твоему в Твоей честней иконе благодарно поклоняемся.

Радуйся, Радосте наша, избави нас от всякаго зла и утоли наша печали.

Кондак 1

Взбранное нам и дивное избавление даровася, Твой образ честный, Преблагословенная Дево Владычице Богородице, яко избавльшеся от злых явлением его и к нему взирающе, восписуем Ти благодарственная раби Твои, Богородице; но яко имущая державу непобедимую, от всяких нас бед свободи, да зовем Ти:

Радуйся, Радосте наша, избави нас от всякаго зла и утоли наша печали.


(После акафиста читается молитва)

Молитва иконе Богородице «Утоли моя печали»

«Дево Владычице Богородице, паче естества и слова родившая Единородное Божие Слово, Творца и Владыку всея твари видимыя и невидимыя, Единаго от Троицы Бога, Бога же и Человека, соделавшаяся обитель Божества, вместилище всякия святыни и благодати, в немже благоволением Бога и Отца, содействием Святаго Духа, телесне обиташе полнота Божества, несравненно превознесенная боголепным достоинством и преимуществующая пред всякою тварию, славо и утешение, и неизреченное веселие ангелов, царственный венче апостолов и пророков, преестественное и чудное мужество мучеников, поборнице в подвизех и подательнице победы, уготовляющая подвижником венцы и воздаяния вечная и боголепная, превысшая всякия чести, честь и славо преподобных, непогрешительная путеуказательице и наставнице безмолвия, двере откровений и духовных таин, источниче света, врата вечныя жизни, неистощимая реко милосердия, неисчерпаемое море всех боголепных дарований и чудес! Тя просим и Тя умоляем, сострадательнейшую Матерь человеколюбиваго Владыки: будь милостива к нам, смиренным и недостойным рабом Твоим, воззри благосердно на пленение и смирение наше, уврачуй сокрушения душ и телес наших, разсей видимыя и невидимыя враги, буди нам, недостойным, пред лицем врагов наших крепкий столп, бранное оружие, сильное ополчение, Воевода и непреоборимая поборница, покажи ныне на нас древния и чудныя милости Твоя, да познают беззаконнии враги наши, яко Сын Твой и Бог Един есть Царь и Владыка, яко Ты воистину Богородица, родившая по плоти истиннаго Бога, яко вся Тебе возможна суть и еже аще восхощеши, Владычице, имаши силу все сие совершити на небеси и на земли, и на всякое прошение даровати коемуждо на пользу: больным здравие, сущим на мори тишину и доброе кораблеплавание. Путешествующим спутешествуй и охраняй их, пленныя спасай от горькаго рабства, утешай печальныя, облегчай нищету и всякое другое телесное злострадание; всех свобождай от душевных недугов и страстей, невидимыми Твоими предстательствы и внушеньми, яко да, добре и непреткновенно совершив путь сея временныя жизни, улучим Тобою и оная вечная благая в Царствии Небеснем.

Верных, почтенных страшным именем Единороднаго Сына Твоего, уповающих на Твое предстательство и на милость Твою и во всем имущих Тя ходатаицу и поборницу, укрепляй невидимо противу обстоящих врагов, разсей облак уныния, избави я от душевнаго утруждения и подай им светлое благодушие и радость, и обнови мир и безмятежие в сердцах их.

Спаси молитвами Твоими, Владычице, сию Тебе посвященную паству, весь град и страну от глада, труса, потопа, огня, меча, нашествия иноплеменных и междоусобныя брани и всякий праведно подвигшийся на нас гнев обрати, по благоволению и благодати Единороднаго Сына и Бога Твоего, Емуже подобает всякая слава, честь и поклонение, со Безначальным Его Отцем, с Совечным и Животворящим Его Духом, ныне и присно и во веки веков. Аминь.»

Читать другие молитвы Божией Матери.


Тропарь, глас 5

Утоли́ боле́зни многовоздыха́ющия души́ моея́, утоли́вшая вся́кую слезу́ от лица́ земли́: Ты бо челове́ком боле́зни отго́ниши и гpе́шных ско́pби pазpу­ша́еши, Тебе́ бо вси стяжа́хом наде́жду и утвеpжде́ние, Пpесвята́я Ма́ти Де́во.

Кондак, глас 6

Предста́тельство христиа́н непосты́дное, хода́тайство ко Творцу́ непрело́жное, не пре́зри гре́шных моле́ний гла́сы, но предвари́, я́ко Блага́я, на по́мощь нас, ве́рно зову́щих Ти: ускори́ на моли́тву и потщи́ся на умоле́ние, предста́тельствующи при́сно, Богоро́дице, чту́щих Тя.

Ин кондак, глас 6

Не вве́ри мя челове́ческому предста́тельству, Пресвята́я Влады́чице, но приими́ моле́ние раба́ Твоего́, скорбь бо обдержи́т мя, терпе́ти не могу́ де́монскаго стреля́ния, покро́ва не и́мам, ниже́ где прибе́гну, окая́нный, всегда́ побежда́емь, и утеше́ния не и́мам, ра́зве Тебе́, Влады́чице ми́ра, упова́ние и предста́тельство ве́рных, не пре́зри моле́ние мое́, поле́зно сотвори́.


Сохранить акафист в социальных сетях:

Добавить комментарий

Ваш адрес email не будет опубликован. Обязательные поля помечены *