Акафист преподобному Иоанну Дамаскину

5/5 - (1 голос)

Оглавление:


Кондак 1

Избранный угодниче Христов, преподобне отче Иоанне, похвальная восписуем тебе, яко златословесному воспевателю херувимских песнопений и серафимских глаголов, Церкви Православныя и нашему заступнику и теплому о нас молитвеннику: ты же яко имеяй дерзновение ко Господу, молися о нас молитвою непрерывной и во гресех прощение испроси зовущим ти:

Радуйся, преподобне отче Иоанне, великий угодниче и преславный чудотворче.

Икос 1

Ангел земный и человек небесный был еси, преподобне Иоанне, и имел еси в житии твоем теплую любовь к Божией Матери, икону Ея святую соорудити потщался еси и сию в келии своей благоговейно поставив, в непрестанных молитвах пребывал еси. Мы же, ублажая тя, сице глаголем:

Радуйся, предстателю о нас пред Господом непостыдный.

Радуйся, к Божией Матери молитвенниче наш неусыпный.

Радуйся, отче наш милостивый и кроткий.

Радуйся, в бедах и обстояниях помощниче скорый.

Радуйся, скорбных и печальных утешение.

Радуйся, всем просящим скорую помощь подаваяй.

Радуйся, преподобне отче Иоанне, великий угодниче и преславный чудотворче.

Кондак 2

Видя, преподобне отче Иоанне, десницу свою, много писавшую в защиту чести и поклонения святых икон, по навету царя иконоборца немилостиво отсеченную, испроси ю от неверного мучителя, и приложив к усеченному ея суставу, слезно моляшеся ко Пречистей Деве Богородице, о еже исцелитися ей, и Всеблагая и Всемощная рода нашего Заступница, молитву твою скоро услышала, и явившись тебе во сне, исцеление усеченней руце даровала еси, да благодарственно поеши Богу: Аллилуиа.

Икос 2

Разум человеческий не может постигнути силу исцелений благодатных, чудесно являемых иконою Божией Матери и изъяснити чудо велие, како отсеченная десница твоя во едину нощь цела и здрава обретеся, на ней же токмо червленный знак бывшия язвы оставлен бысть Врачебницею Благою, ублажая Царицу Небесную похвалами тебе, угодниче Божий, сице глаголем:

Радуйся, златословесными устами небесныя истины вещаяй.

Радуйся, усердный Божий служителю.

Радуйся, ангелов сожителю.

Радуйся, преподобных собеседниче.

Радуйся, прибегающих к тебе теплый заступниче.

Радуйся, от Бога дарованный заступниче и покровителю.

Радуйся, преподобне отче Иоанне, великий угодниче и преславный чудотворче.

Кондак 3

Силу десницы Всевышняго в исцелении усеченныя десницы своея показав, богоглаголивый Иоанне, песньми красными воспе Владычицу Всеблагую и подобие усеченныя руки своея приложи к целебному образу Божией Матери ради памяти всегдашния о великом чудеси; посему ныне видима есть и именуется сия святая икона Троеручица, тремя руками, на ней описанными прославляюща таинство Святыя Троицы, чудесы же от нея бывающими всех приводящая хвалебно взывати ко Господу: Аллилуиа.

Икос 3

Имеяй велию ревность по Бозе, духоносный песнописец святыя Церкве и божественный славитель ея сладкий, преподобне Иоанне, хвалебными пении до конца жизни своея прославляше дивную милость Богородительницы, в память же бывшего чудесе плат, имже усеченная рука твоя обернута бе, на главе своей ношаше, икону же Богоматери многоцелебную, яко наследие богатое, предаде святой Лавре преподобнаго Саввы Освященнаго, всем верным на поклонение. За таковое твое о душах наших попечение, по долгу взываем тебе сице:

Радуйся, яко Богу совершенно угодил еси.

Радуйся, яко венец безсмертныя жизни получил еси.

Радуйся, наслаждаяйся райския сладости.

Радуйся, насыщаяйся Божия благости.

Радуйся, верных учителю и наставниче.

Радуйся, врагов святыя православныя веры крепкий поборниче.

Радуйся, преподобне отче Иоанне, великий угодниче и преславный чудотворче.

Кондак 4

Буря недоумения смущает мой ум, преподобне отче Иоанне, како достойно Богу возглаголати величия твоя, но ты яко благий и милосердный, воззри не на достоинство творения сего, но на усердное наше произволение и научи нас грешных, како подобает душею ощущати славословие Божие и пети: Аллилуиа.

Икос 4

Слышавше ближнии и дальнии, преподобне отче наш Иоанне, ангелоподобное житие твое, и яко молитвою твоею мнози, с верою к тебе притекающии, утешение приемлют благодатное и благодарне воспоминающе о толиких твоих благодеяниях, яже оставил еси нам в песнопениях и песнех духовных, радостно взываем к тебе таковая:

Радуйся, яко Бога ради отечества страну оставил еси.

Радуйся, яко божественными песнопении нас просветил еси.

Радуйся, столпе благочестия.

Радуйся, вместилище добродетелей.

Радуйся, златословесными устами небесныя истины вещаяй.

Радуйся, земныя почести ни во что же вменяяй.

Радуйся, преподобне отче Иоанне, великий угодниче и преславный чудотворче.

Кондак 5

Боготечно, яко светозарная звезда, шествовал еси, угодниче Божий, во святейший град Иерусалим на поклонение святым местам, идеже и остался не возвращаясь в мир, вступил еси иноком во обитель преподобнаго Саввы Освященнаго, благодарственно воспевая Богу: Аллилуиа.

Икос 5

Видевше ангельстии чинове равноангельное житие твое, отче богоблаженне, смирения твоего глубину, молитвы непрестанныя, воздержания твердость и велию ревность духа твоего о чистоте, удивишася и прославиша человеколюбца Бога, укрепляющего немощное естество человеческое. Мы же ублажаем тя и зовем сице:

Радуйся, иночествующим дивное украшение.

Радуйся, возлюбивый благолепие дому Божия.

Радуйся, помазание приемый от Святаго Духа.

Радуйся, освященный сосуде благодати Божией.

Радуйся, рабе Христов благий и верный.

Радуйся, слуго Господень истинный.

Радуйся, преподобне отче Иоанне, великий угодниче и преславный чудотворче.

Кондак 6

Проповедник богоносный быв, преподобне Иоанне, истинному боговедению и благочестию поучал еси присно братию и образом жития своего наставлял еси на путь спасения, да воспоем вси Богу: Аллилуиа.

Икос 6

Возсия в душе твоей блистающий свет истиннаго боговедения, освещая души верных, со сладостию внимающих песнопениям, тобою составленным, и похваляющим тя сице:

Радуйся, орган Духа Всесвятаго.

Радуйся, тимпане, услаждающий благочестивых чувства.

Радуйся, источниче Богодухновенных песнопений.

Радуйся, свирель доброгласная, песньми духовными веселящая души человеческия.

Радуйся, псалтирь, славу Божию возвещающая.

Радуйся, Божия благодати струя неиссякающая.

Радуйся, преподобне отче Иоанне, великий угодниче и преславный чудотворче.

Кондак 7

Хотя, преподобне отче Иоанне, утешати брата монашествующего, скорбящего о кончине друга, потщался еси, во утешение его написати песнопения о упокоении душ усопших во Царствии Небеснем, сего ради воспеваем ангельскую песнь Вседержителю Богу: Аллилуиа.

Икос 7

Новаго тя молитвенника и чудотворца предивнаго яви тя Господь, преподобне отче Иоанне, темже и светло тобою красуется Церковь православная, яко дерзновение велие ко Христу имаши, Емуже молися о нас грешных, любовию тебе вопиющих сицевая:

Радуйся, пресветлый светильниче веры православныя.

Радуйся, благочестия ревностный поборниче.

Радуйся, Церкве Божия столпе непоколебимый.

Радуйся, храмино добродетелей преукрашенная.

Радуйся, яко верных людей списании твоими усладил благочестивыя чувства.

Радуйся, златословесными устнами вещал еси небесныя истины.

Радуйся, преподобне отче Иоанне, великий угодниче и преславный чудотворче.

Кондак 8

Странника и пришельца помышлял еси себе быти в мире сем непостояннем, преподобне отче, и грядущего града Иерусалима небесного взыскуя, вся помышления твоя к нему возносяй, ум твой на божественная возложив, и распинал еси плоть твою со страстьми и похотьми, сладце воспевая, яко в тимпане, во умерщвленнем телеси, победную песнь Христу Богу: Аллилуиа.

Икос 8

Весь облеклся еси во вся оружия Божия, яко воин Христов, препоясав чресла твоя истиною, облеклся в броню правды, и обув нозе твои во уготование благовествования мира, восприял еси щит веры и шлем спасения, и меч духовный, иже есть глагол Божий, имже и возмогл еси вся наветы лукаваго победити; помози убо и нам, отче преподобне, твоими молитвами, противитися искушениям вражиим, и подражати тебе в побеждении страстей наших, да зовем тебе:

Радуйся, смирением святым гордыню душепагубную поправый.

Радуйся, кротостию совершенною ярости пламень погасивый.

Радуйся, нищим богатство твое расточивый и сребролюбие возненавидивый.

Радуйся, всякия досаждения и обиды без гнева претерпевый.

Радуйся, яко молитвами непрестанными уныние прогнал еси от себе, и достигл еси о Господе радования.

Радуйся, яко воздержанием и бдением целомудренно душу и тело свое соблюл еси.

Радуйся, преподобне отче Иоанне, великий угодниче и преславный чудотворче.

Кондак 9

Всякое наслаждение плотское возненавидел еси, Иоанне преблаженне, и Единаго Бога всем сердцем возлюбил еси; темже и Господь тя возлюби и чудесы прослави, даровав нам тебе молитвенника благоприятнаго пред благостию Его: смиренно молим тя, егда имамы предстати пред Судиею Праведным, умоли Его за нас, да не помянет беззаконий наших, и сподобит нас блаженной участи одесную стоящих и вопиющих Ему: Аллилуиа.

Икос 9

Вития многовещанныя, не довлеют изглаголати вся подвиги твоя и чудеса, богомудре отче Иоанне, ибо доброта жития твоего воистину превосходит похвалу человеческую, обаче мы, любовию к тебе побеждаеми, дерзаем смиренно благохвалити тя пением таковым:

Радуйся, святыя православныя Церкви светильниче немерцающий.

Радуйся, обители твоей утверждение и похвало.

Радуйся, иночествующих ликов пречудная красото.

Радуйся, христианскому роду присное утешение.

Радуйся, любящим и чтущим тя ходатаю спасения.

Радуйся, приводяй грешных ко исправлению.

Радуйся, преподобне отче Иоанне, великий угодниче и преславный чудотворче.

Кондак 10

Спасение вечное унаследовал еси, угодниче Божий, и кончину праведную яко венец подвигом твоим получил еси, неболезненно и мирно прешел от земных к обителем небесным, идеже святая твоя душа воздаяние прия от руки Вседержителя Бога, и со ангельскими воинствы предстоит престолу Его Божественному, воспевая немолчную Ему песнь: Аллилуиа.

Икос 10

Царя Небеснаго рабе благий и верный, данный тебе талант не сокрывый, но трудолюбно его усугубивый и многу куплю духовно им сотворивый, отче Иоанне, помози и нам, земным и перстным, подражати житию твоему святому и стяжать при исходе нашем благую надежду спасения, да поем тебе умиленными гласы:

Радуйся, святче Божий, свято и непорочно скончавый жизнь земную.

Радуйся, избранниче Христов, безболезненно и мирно предавый дух твой в руце Божии.

Радуйся, яко смерть твоя честна пред Господем и успение со святыми.

Радуйся, яко память твоя с похвалами почитается во святей Церкви.

Радуйся, яко преселився в небесныя обители и земных не оставляеши.

Радуйся, усердный всех прибегающих к тебе заступниче и скорый предстателю.

Радуйся, преподобне отче Иоанне, великий угодниче и преславный чудотворче.

Кондак 11

Пение хвалебное приносим тебе, преподобне, но скудными песньми хвалим тя: яко аще отрочество твое, аще юность, аще старость вся исполнена суть дел благих и любве, яже к Богу и ближнему, вся вещают едину песнь Богови: Аллилуиа.

Икос 11

Мирную кончину твою видевше ученицы твои, великий угодниче Божий, скорбь разлучения с тобою утешением благодатным раствориша в уповании всесильного предстательства твоего горе у престола Божия, идеже слышиши с любовию тебе зовущих:

Радуйся, венец безсмертныя жизни от руки Вседержителя приемый.

Радуйся, всесветлаго Царствия Христова наследниче.

Радуйся, Иерусалима горняго гражданине.

Радуйся, Небеснаго Сиона жителю.

Радуйся, по трудех временныя жизни покой вечный получивый.

Радуйся, блаженство, от века праведным уготованное, праведно восприявый.

Радуйся, преподобне отче Иоанне, великий угодниче и преславный чудотворче.

Кондак 12

Благодать божественную испроси нам, угодниче Божий, да присно покрывает нас от врагов видимых и невидимых, да научит ны подражати тебе в чистоте ангельстей и незлобии, да направит сердца наша к смирению, покаянию и неослабному исполнению заповедей Христовых; да дарует нам христианскую кончину и безбедно проведет нас чрез воздушный путь, да сподобит тамо узрети славу великаго Бога и вечно пети Ему: Аллилуиа.

Икос 12

Поем доблестные подвиги твоя, добропобедный воине Христов, отче наш Иоанне, ублажаем блаженную кончину твою, тебе усердно воспевая:

Радуйся, яко свято и праведно на земли пожил еси.

Радуйся, яко воистину ангел земный и человек небесный был еси.

Радуйся, яко память твоя с похвалами, и успение со святыми.

Радуйся, яко отверзошася тебе врата райская, и вшел еси в радость Господа твоего.

Радуйся, яко душу твою Жизнодавец Христос прият в небесныя селения.

Радуйся, яко со бесплотными силами Трисвятую песнь Богу немолчно поеши.

Радуйся, преподобне отче Иоанне, великий угодниче и преславный чудотворче.

Кондак 13

О, великий и преславный чудотворче, преподобне отче наш Иоанне! Милостиво прияв сие малое моление наше, молитвами твоими сохрани нас от недугов душевных и телесных в жизни сей и грядущих мучений вечных ибави и сподоби нас вкупе с тобою во Царствии Небеснем пети Богу: Аллилуиа.

Этот кондак читается трижды, затем икос 1 и кондак 1

Икос 1

Ангел земный и человек небесный был еси, преподобне Иоанне, и имел еси в житии твоем теплую любовь к Божией Матери, икону Ея святую соорудити потщался еси и сию в келии своей благоговейно поставив, в непрестанных молитвах пребывал еси. Мы же, ублажая тя, сице глаголем:

Радуйся, предстателю о нас пред Господом непостыдный.

Радуйся, к Божией Матери молитвенниче наш неусыпный.

Радуйся, отче наш милостивый и кроткий.

Радуйся, в бедах и обстояниях помощниче скорый.

Радуйся, скорбных и печальных утешение.

Радуйся, всем просящим скорую помощь подаваяй.

Радуйся, преподобне отче Иоанне, великий угодниче и преславный чудотворче.

Кондак 1

Избранный угодниче Христов, преподобне отче Иоанне, похвальная восписуем тебе, яко златословесному воспевателю херувимских песнопений и серафимских глаголов, Церкви Православныя и нашему заступнику и теплому о нас молитвеннику: ты же яко имеяй дерзновение ко Господу, молися о нас молитвою непрерывной и во гресех прощение испроси зовущим ти:

Радуйся, преподобне отче Иоанне, великий угодниче и преславный чудотворче.


(После акафиста читается молитва)

Молитва святому преподобному Иоанну Дамаскину

«Преподобне и преблаженне отче наш Иоанне, вонми нам, к тебе смиренно припадающим и твоего заступления тепле просящим. Веси немощи наша, веси грехи наша, но и усердие наше не утаися от тебе: умоли Спасителя нашего Господа Иисуса Христа, даровати нам оставление многих согрешений наших и утверди нас на пути делания заповедей Его. Огради нас твоими молитвами от всех искушений и бед. Отврати надлежащие нам скорби и напасти, и даруй нам в здравии, мире, тишине и благоугождении Богу провождати дни жития нашего: испроси нам время на покаяние и ответ благоприятен на страшнем судищи Христове, да с тобою и со всеми избранными славим вечно Отца и Сына и Святаго Духа во веки веков. Аминь.»

Читать другие молитвы святому Иоанну Дамаскину.


Тропарь святому Иоанну Дамаскину, глас 8

Правосла́вия наста́вниче, / благоче́стия учи́телю и чистоты́, / вселе́нныя свети́льниче, / мона́шествующих Богодохнове́нное удобре́ние, Иоа́нне прему́дре, / уче́ньми твои́ми вся просвети́л еси́, цевни́це духо́вная, // моли́ Христа́ Бо́га спасти́ся душа́м на́шим.

Кондак святому Иоанну Дамаскину, глас 4

Песнопи́сца и честна́го Богоглаго́льника, / Це́ркве наказа́теля и учи́теля, / и враго́в сопротивоборца́ Иоа́нна воспои́м: / ору́жие бо взем – Кре́ст Госпо́день, / всю отрази́ ересе́й пре́лесть / и я́ко те́плый предста́тель к Бо́гу // всем подае́т прегреше́ний проще́ние.


Сохранить акафист в социальных сетях:

Добавить комментарий

Ваш адрес email не будет опубликован. Обязательные поля помечены *