Оглавление:
Кондак 1
Мудрости века сего юродство креста Христова предпочет, вся мира сладкая и льстивная якоже изгребие пещное вменил еси, отче Гаврииле. И крест свой взем, единому Христу последовал еси издетска и до последняго издыхания. И тако вшел еси в Небесныя Обители, идеже ныне предстоя своему Владыце, молиши о нас, пою́щих ти: Радуйся, блаженне Гаврииле, любовь свою в научение нам оставивый!
Икос 1
Евангелие обрет, якоже сокровище, на селе сокрытое, с радостию вся расточил еси, да Христа приобрящеши, и якоже купленый раб в винограде Господнем неленостно делал еси. И мы тебе поем:
Радуйся, делателю перваго часа!
Радуйся, яко раба, ничесоже сотворша, себе вменяяй!
Радуйся, яко апостол Андрей, на зов Христов не замедливый!
Радуйся, яко Петр, горячим сердцем его приемый!
Радуйся, от Него ничесоже для себе утаивый!
Радуйся, яко лепты вдовичи все житие свое в дар Богу ввергнувый!
Радуйся, добрая земле, на нейже семя прозябе и приплодова!
Радуйся, таланты, от Бога данныя, многажды возрастивый!
Радуйся, блаженне Гаврииле, любовь свою в научение нам оставивый!
Кондак 2
Еще греха не познав, на плоть свою вооружился еси, похотствует бо на духа, якоже апостол рече. издетска не зная ни сытости, ни мягкаго ложа, чтению же Евангелия прилежа и усердней молитве. Таковей твоей ревности о Бозе удивляемся, тебе глаголюще: Аллилуия.
Икос 2
Раздражен твоими подвигами, бес явися ти въяве, отмстити хотя. Обаче Господь от рождения храняй тя яко сосуд свой избранный, благодатию Своею тя сохрани. И мы тебе взываем тако:
Радуйся, измлада к себе жалости не имеяй!
Радуйся, отроче, бесу противоборствуяй!
Радуйся, и матере ради от образа жития своего не отступивый.
Радуйся, саму душу свою́ в мире сем возненавидевый.
Радуйся, в меру древних отцев во бдении и постничестве пришедый,
Радуйся, инем же по силам подвизатися благословляяй.
Радуйся, плоть свою, яко жертву живу, святу, благоугодну Господеви принесый.
Радуйся, за словеса Господня сохранивый пути жестоки.
Радуйся, блаженне Гаврииле, любовь свою в научение нам оставивый!
Кондак 3
Много скитаний претерпел еси ты, отче, еще отрок сый, ходя из монастыря в монастырь, дондеже пришел еси в Бетани, нашед отцев своих духовных, с нимиже ныне поеши Христу, тобою возлю́бленному, хвалебную песнь: Аллилуия!
Икос 3
Послежде, приял еси достоинство монаха и священника, по сих и архимандрита, но и во всем житии твоем многая лета не имел еси себе пристанища. И на кладбище среди могил немало жил еси, питаяся подаянием, и тако Господу своему последуя, не имущему, где главу преклонити. Сего ради твоим по Христе шествием поучаеми, зовем ти сице:
Радуйся, гонимый, яко вси о Христе благочестно жити хотящии,
Радуйся, Господень апостоле, без сумы и злата посланный. Радуйся подвижниче, до времене никем не познанный.
Радуйся, послежде всеми любимый и почитаемый.
Радуйся, житием среди могил страх навсегда победивый.
Радуйся, единаго греха оттоле боятися научивыйся.
Радуйся, глад и мраз в ничесоже вменяяй любве ради Христовы.
Радуйся, рекий, яко скорбьми научаемся вере и любви!
Радуйся, блаженне Гаврииле, любовь свою в научение нам оставивый!
Кондак 4
Церковь Христову, в запустении бывшую, воссозидал еси, отче Гаврииле, еще издетска играя, отроком же тяжкие камни нося и церковь порушенную возводя по зову святаго Георгия, по сих же и храм свой прекрасный создав, в негоже и ныне приходят вернии воспети Богу: Аллилуия!
Икос 4
Отче Гаврииле, созидая святыни и образы по домам собирая, радел еси ты, дабы жертва Богови приношашеся и таинства совершахуся, и тако да возсоздани будут храми порушении в душах человеческих, да возносится в них молитва Богови. Сего ради мы, благодарнии, взываем сице:
Радуйся, святынь благоговейный хранителю!
Радуйся, икон, в небрежении бывших, попечителю!
Радуйся, во всяцем человеке икону Божию лицезревый!
Радуйся, образ порушенный человеком возвращаяй!
Радуйся, храм свой велелепый создавый и возсоздавый!
Радуйся, емуже ангели яко подмастерия служаху!
Радуйся, храм свой телесный свят и чист в служение Богови уготовавый!
Радуйся, яко ныне мощи твоя источают благодать!
Радуйся, блаженне Гаврииле, любовь свою в научение нам оставивый!
Кондак 5
Отче святый, ты рекл еси, яко монаху твердым во истине быти подобает. Ты же до крове и до смерти свидетельствовал еси веру твою, егда изшел еси на площадь, аки на тризнище, древним мучеником подобен, смерть Христа ради предпочет согласию с поклонением идольским. Твоему дерзновению подражати не могуще, поем тебе: Аллилуия!
Икос 5
Твердо шел еси, отче, на муки и смерть, егда огнем возжегл еси изображение идольское, глаголя заповедь Господню, еже не сотвори себе кумира, ни всякаго подобия его, паству свою́ научая Богу единому воздавати поклонение. Темже мы, маловернии, вохваляем тя сице:
Радуйся, богодохновенный веры исповедниче!
Радуйся, добрый пастырю, о пастве своей радеяй!
Радуйся, Христа ради пострадати желавый!
Радуйся, сугубая мучения, в темнице и среди безумных претерпевый!
Радуйся, смерти токмо силою Божиею избегнувый!
Радуйся, оттоле яко безумец вмененный!
Радуйся, якоже отреби миру бывый!
Радуйся, торжество Церкве новаго времене!
Радуйся, блаженне Гаврииле, любовь свою в научение нам оставивый!
Кондак 6
Яко монах тщательнейший, отче Гаврииле, вся заповеди хранил еси, особливо же смирение, яко Богу свещу неугасимую. Еще отроку тебе бывшу делал еси седалищем своим кучу сора, себе аки ничтоже вменяя. Подвиг же юродства на себе подъяв, себе являше аки безумца и аки пианицу, и аки последняго грешника. Таковому подвигу твоему хваление возносяще, взываем: Аллилуия!
Икос 6
Глаголал еси, отче, и чадом своим смирение стяжати, яко в Рай вводящее, и многажды поучал еси сопротив грехов гордыни, наипаче же то житием своим являл еси, николиже свои дарования показуя, но токмо смотрительно являя, для пользы верных. Мы же, гордынею своею связани бывше, аки узами многими, взываем ти сице:
Радуйся, яко пагубу для монаха похвалу именовавый!
Радуйся, тебе обидевших, оскорбивших и посмеявшихся еще паче жалеяй и любяй!
Радуйся, яко возвышение себе мерзостью пред Господем видяй!
Радуйся, яко в осуждении токмо глупость, яже есть незнание себе, прозревый,
Радуйся, яко приходящаго к тебе, аще грешен еси, вопрошаше.
Радуйся, самаго себе аки грешника истинно исповедавый.
Радуйся, яко проповедию своею смиренною силу Божию являяй! Радуйся. аки отроча, в Царствие Небесное невозбранно вшедый!
Радуйся, блаженне Гаврииле, любовь свою в научение нам оставивый!
Кондак 7
Народа своего скорби в сердце нося, отче Гаврииле, о Грузии, уделе избраннем Божия Матере, усердно молитвы возсылал еси, глаголя, яко горе монаху, не молящуся о народе своем. За таковое твое усердие сыновнее, поем тебе: Аллилуия!
Икос 7
Предвозвещал еси, отче, Грузии во тьме неверия сущей и Церкви ея гонимей воскресение, якоже Лазарю, обаче чрез великая испытания. И был еси кость от кости народа своего и святыя Нины и сонма святых грузинских чадо духовное. Обаче и Египетскому Макарию и Саровскому Серафиму брат о Христе и сотаинник истинный. И ныне вси концы земли тебе поют:
Радуйся, до кончины своея сердцем о Грузии болеяй!
Радуйся, на Афон поменяти ю не возжелавый!
Радуйся, просветление духовное народа своего провидяй!
Радуйся, пред Вторым Пришествием славу Грузии провозвестивый!
Радуйся, яко аз уношу любовь ко всему народу православному, пред кончиною рекий.
Радуйся, крестом своим всю Грузию и половину России именовавый!
Радуйся, страждущия Грузии сыне верный,
Радуйся, мама Габриэли, всем православным мира отче чадолюбивый!
Радуйся, блаженне Гаврииле, любовь свою в научение нам оставивый.
Кондак 8
От младенства милостив и милосерд был еси, отче Гаврииле, постнический же подвиг прошед и исповедничеством просияв, достигл еси в любовь Христову, яже есть исполнение закона. Тою любовию твоею мы согреяни бывше, ближнии и дальнии, благодарно поем тебе: Аллилуия!
Икос 8
Образ любве совершенныя о Христе Иисусе явил еси нам, отче преподобне, яже не завидит, не мыслит зла, радуется же о истине, вся терпит, всему веру емлет, яже николиже отпадает. Всякаго человека приимал ты в объятия души своея. Темже мы, чада твоя, зовем ти:
Радуйся, егоже сердце горя бе о Христе, якоже у апостол на пути во Еммаус.
Радуйся, в ближнем своем Христа всегда лицезревый!
Радуйся, емуже любы даде зрение душ человеческих.
Радуйся, емуже любы даде память николиже ослабевающую.
Радуйся, никогоже единожды виденнаго забвению предававый.
Радуйся, яко отец грехи их с любовию обличаяй.
Радуйся, человека без любве яко сосуд без дна именовавый!
Радуйся, яко Паисий старец, душу свою ближняго ради положивый.
Радуйся, блаженне Гаврииле, любовь свою в научение нам оставивый!
Кондак 9
Молитва твоя, блаженне, досязаше до небес, бяше бо со смирением, страхом Божиим и со слезами, дадеся бо тебе дар слезный, и в церкви-келлии твоей на месяцы затворяся, плакаше, якоже старец Силуан, о своих гресех, об отечестве твоем, и обо всем Адаме. Сего ради, и днесь, твоих молитв просяще, зовем ти: Аллилуия!
Икос 9
Особливо призывал еси, пастырю рачительный, дабы молитва не была во грех, да молитве той добрая дела последуют – тако подобает молитися. Моляйся же и заповеди не исполняяй – зле молится, тако глаголал и делал еси. И мы яко пастырю нашему тако взываем ти:
Радуйся, заповедовавый Богу со страхом предстояти!
Радуйся, наказуяй неспешно молитися, а не тра-та-та глаголати!
Радуйся, яко всуе беспокоити Бога возбранявый!
Радуйся, яко молитву без дел мертвою именовавый!
Радуйся, яко молитися за ближнего учай, та бо молитва любви научает!
Радуйся, яко начинати о о ближних молитися и тако даже до врагов доходити наставляяй.
Радуйся, каятися более сердцем, неже слезами призываяй.
Радуйся, блаженне Гаврииле, любовь свою в научение нам оставивый!
Кондак 10
Веру православную, отцами преданную, твердо хранил еси, Гаврииле преподобне, якоже отцы глаголаху, уне есть блудником быти, неже еретиком, Понеже, рекл еси, несть любве спасительныя кроме Господа Иисуса Христа, Иже есть Истина и Живот. Темжы мы, твоему стоянию в вере приносим хвалебную песнь: Аллилуия!
Икос 10
Любяй всякаго человека, отче, любве исполненный, ты рекл еси отметатися еретиков, глаголя: яко от Господа заповедано не давати святыни псом, ниже метати бисера пред свиниями, т́акожде и о ереси ересей упреждал еси, яже есть екуменизм, изменою Христу нарицая. Темже мы, в сомнениих и колебаниих пребывающии, зовем ти:
Радуйся, веру свою́ позволити ругати, погибели приравнявый.
Радуйся, без церкве живущих яко богохульников вменявый.
Радуйся, яко за свое рождение в вере православней Бога благодарити заповедавый,
Радуйся, яко пещися о еже спасутся ли во инех верах сущия, не велевый.
Радуйся, любовь свою́ и на самех врагов Божиих простираяй.
Радуйся, своим примером в правую веру обращаяй.
Радуйся, яко времена антихриста скоро хотящая быти предрекаяй.
Радуйся, имети веру в сердце, а не в разуме, дабы того распознати, призываяй!
Радуйся, блаженне Гаврииле, любовь свою в научение нам оставивый.
Кондак 11
Подвижниче дивный, тебе Господь, смиренныя возносяй, сицевыми дарми обогати, якоже гостившим в келлии твоей сердце умиляшеся сознанием грехов своих. Имел бо еси ты власть удаляти из мыслей вся злая и оставляти токмо для Небеснаго Царствия полезная. Тою силою Господнею в тебе действующею изумлени бывше, рцем ти: Аллилуия.
Икос 11
Многия изцелил еси ты, отче, являя им помыслы и тайная души их. По молитве твоей дождь велий абие преста, егда покойника хоронить надлежаше. Ты же посту и бдению прилежа, юродством скрывал еси дары своя и сияние души своея. Ныне же, поклоняющеся иконе твоей и от тебе помощи просяще, взываем сице:
Радуйся, дарованьми своими меру смертных превозшедый!
Радуйся, яко беседою своею глубокое раскаяние даровавый!
Радуйся, в созерцании во инем монастыре гостивый и тамо бывшая поведавый.
Радуйся, младенца во утробе матерни слово Божие слушати благословивый.
Радуйся, емуже Господь даде прозрети глубины душ человеческих!
Радуйся, яко апостол любве, на персех Господних возлежай,
Радуйся, яко тому подобне, тебе Господь безвестная и тайная своя открыл есть.
Радуйся, яко буее Божие премудрее человек быти свидетельствовавый.
Радуйся, блаженне Гаврииле, любовь свою в научение нам оставивый!
Кондак 12
Последних времен подвижниче, поучал еси ты паству твою, яко ныне Бог взыскует от нас любве, яже изсяче от беззаконий многих, токмо бо любовию сможет человек устояти в вере пред кончиною века. И яко тоя делателю и учителю взываем тебе: Аллилуия!
Икос 12
Поучал еси, отче святый, яко в любви есть соуз совершенств, и сия есть конечное обожение, Посему и враг человеческий супротив нея подымает наивышшую брань, зело скорбя о ней. Сего ради всему предпочитати подобает дела любве, понеже без дел мертва есть. Мы же, каплю тоя наследовати хотяще, возносим тебе песнь:
Радуйся, пяти мудрым девам уподобивыйся!
Радуйся, сотворивый и научивый!
Радуйся, мудрый любве делателю и к деланию призываяй.
Радуйся, любовь яко подвиг, нашему времени данный, нарицаяй.
Радуйся, еже той научити, своею заботою первейшею полагаяй!
Радуйся, яко прошение о милостыни аки милость Божию вменяти назидаяй!
Радуйся, любве служителю и рачителю, сия бо есть Сам Господь!
Радуйся, яко без Христа вся ничтоже суть, заповедавый!
Радуйся, блаженне Гаврииле, любовь свою в научение нам оставивый!
Кондак 13
О, блаженный отче, подвижниче и исповедниче, верный Христов служителю, все житие свое Тому усокровиществовавый и по кончине своей в Нем сокровище свое обретый, якоже сам предрек. Ныне со ангелы и со всеми святыми предстоя Престолу Господню, помолися о нас, мама Габриэ́ли, с мольбою к тебе прибегающих, умоли милосердаго Владыку, да и в наша изсохшая гордостию сердца пролиется капля твоего блаженнаго упования, веры и любве. Да поем с тобою: Аллилуия!
(Этот кондак читается трижды. Затем Икос 1 и Кондак 1)
Икос 1
Евангелие обрет, якоже сокровище, на селе сокрытое, с радостию вся расточил еси, да Христа приобрящеши, и якоже купленый раб в винограде Господнем неленостно делал еси. И мы тебе поем:
Радуйся, делателю перваго часа!
Радуйся, яко раба, ничесоже сотворша, себе вменяяй!
Радуйся, яко апостол Андрей, на зов Христов не замедливый!
Радуйся, яко Петр, горячим сердцем его приемый!
Радуйся, от Него ничесоже для себе утаивый!
Радуйся, яко лепты вдовичи все житие свое в дар Богу ввергнувый!
Радуйся, добрая земле, на нейже семя прозябе и приплодова!
Радуйся, таланты, от Бога данныя, многажды возрастивый!
Радуйся, блаженне Гаврииле, любовь свою в научение нам оставивый!
Кондак 1
Мудрости века сего юродство креста Христова предпочет, вся мира сладкая и льстивная якоже изгребие пещное вменил еси, отче Гаврииле. И крест свой взем, единому Христу последовал еси издетска и до последняго издыхания. И тако вшел еси в Небесныя Обители, идеже ныне предстоя своему Владыце, молиши о нас, пою́щих ти: Радуйся, блаженне Гаврииле, любовь свою́ в научение нам оставивый!
(После акафиста читается молитва)
Молитва святому преподобноисповеднику Гавриилу Ургебадзе, Самтаврийскому
«Отче святый, блаженне Гаврииле, преподобным древним подобниче и твердый исповедниче, с малых лет словеса Господня восприявый и тем ревностно последовавый! Се мы, раби ленивии и лукавии тебе предстоим с молитвою, не имеюще ни подвигов твоих, ниже смирения, но себе на всяк день в души хваляще и величающе, еще же и врагов вовне себе ищуще! Не имамы пред Богом чем оправдитися! Но моли за нас, отче, да подаст нам Господь силы слово Свое разумети и исполняти, якоже тебе от младенства откры. Да будем мы, себе христианы именующе, не токмо слышателие рассеяннии, но и исполнителие. Да уразумеем лице бытия своего, яко ничесоже можем кроме помощи Божией. И да взыщем тоя и да возлю́бим Его, и да прилепимся к Нему всею душею своею, всем сердцем своим, всем помышлением своим, и да будет сердце наше, по слову твоему, преданным Господу. И да подаст нам залог спасения в души наша, радость, мир и любовь в сердца наша, примирение во всех нестроениих наших, утешение во всех скорбех наших, не от дел наших, но молитвами твоими, по неизреченней милости Своей, Емуже слава и держава во веки веков. Аминь»
Тропарь Гавриилу Ургебадзе, глас 4
Яко Владыка Христос Божественное естество Свое / человеческим сокры, / и тако нам незримым содела / несказанное Величество Свое, / ты же, всехвальный отче Гаврииле, / Ему уподобился еси, / подвигом юродства сокрывый духовное сияние твое, / и исповедничеством Веры ставый пастырем истинным, / преподобный отче Гаврииле, // моли Христа Бога спастися душам нашим.
Ин тропарь святому Гавриилу Самтаврийскому, Глас 8
Николи́же своея́ сла́вы жела́я, то́кмо сла́вы Бо́жия,/ юро́д во Христе́, преподо́бне о́тче Гаврии́ле, яви́лся еси́,/ и и́долу не покло́нься, всесожже́ние Бо́гови прине́сл еси́,/ и храм Бо́жий воздви́г, ду́шу свою́ храм благоле́пен соде́лал еси́,/ и зерца́ло чи́стое Боже́ственныя любве́ яви́лся еси́./ О́тче Гаврии́ле блаже́нне, испове́дниче и преподо́бне,/ моли́ Христа́ Бо́га то́ю любо́вию ороси́ти и ду́ши на́ша.
Кондак святому Гавриилу Ургебадзе, глас 4
Необъятно есть милосердие Божие, / Егоже благостию лицезреем мы создание Им обоженное, / ты же отче преподобне,/ образ Создателя твоего в себе утвердил еси, / и вознесл еси страдании естество твое в подобие Божие,/ темже славим тя, отче Гаврииле, / яко достоин еси ты всякия похвалы, / был еси на земли цевница правды, проповедник любве и голубь чистоты, / а твоим всечудным смирением / открыл еси миру кладезь мудрости, / и ныне на Небеси ты еси // ходатаю милосердия Божия и нашего спасения.
Ин кондак святому Гавриилу Самтаврийскому, глас 5
Свети́льник горя́й и светя́й/ во времена́ безбо́жия яви́лся еси́,/ и зарю́ благоче́стия всем возсия́л еси́:/ те́мже Госпо́дь тя просла́ви,/ своя́ безве́стная и та́йная тебе́ яви́в:/ о́тче Гаврии́ле,/ моли́ ми́лостиваго Бо́га/ поми́ловатися душа́м на́шим покая́нием.
Величание
Ублажаем тя, / преподобне отче Гаврииле, / и чтим святую память твою, / наставниче монахов / и собеседниче ангелов.
В 2018г. нашей “Светлице” подарили ежедневник с таким же названием. Открыв книгу произвольно, вижу портрет монаха, глаза которого с бумажной страницы излучали сияние любви, а под фотографией слова: “Для того только мы пришли в этот мир, чтобы как можно больше сделать добра”. Господи! Да это же девиз нашей команды “Светлица”, собирающей людей на праздники наших предков и просвещающей приходящих с любовью, за чаепитием у самовара! Попросила напечатать его портрет (о существовании иконы ещё не знала). Поместили портрет рядом с иконой Тайная Вечере, также подаренной одним незнакомым белорусом 5 лет назад. И теперь его любящий, пронзающий душу взгляд ласкает нас , защищая от нападок духовных противников. Теперь нашли и грузинский храм, где возлежат мощи Мамочки Габриэли, и Акафист