икона Евфросинии Колюпановской

Акафист блаженной Евфросинии Колюпановской, великой княгине Московской

Акафист блаженной Евфросинии Колюпановской, великой княгине Московской
5 (100%) 1 голос.

Оглавление:


Кондак 1

Избранной Богом от палат царских в Небесный Чертог Райский; блаженней старице Евфросинии, Христа ради юродивей, яко покровительнице нашей и молитвеннице похвальное принесем пение. Ты же, блаженная мати, яко имея дерзновение ко Господу, от всяких нас бед и болезней свободи, с любовию зовущих ти:

Радуйся, блаженная старице Евфросиние, Колюпановская похвало и всея земли Тульския преславное украшение.

Икос 1

Ангелом хранителем ко спасению наставляема, юная княжна Вяземская, презрев роскошь и богатство, славу и знатность и вся прелести суетнаго мира сего, оставила еси царский дворец, вступив на узкий и тернистый путь, ведущий в Царство Небесное. За сие приими от нас, блаженная, похвалы сия:

Радуйся, яко Бога ради из палат царских исшла еси;

радуйся, яко ради спасения души своея вся земная презрела еси.

Радуйся, яко самопроизвольную нищету ради Христа избрала еси;

радуйся, яко богатство нетленное и вечное обрела еси.

Радуйся, яко Небесному Жениху Христу уневестилася еси;

радуйся, яко с мудрыми девами в Чертог Его Небесный вошла еси.

Радуйся, чистая голубице Христова;

радуйся, непорочная Агнице Божия.

Радуйся, блаженная старице Евфросиние, Колюпановская похвало и всея земли Тульския преславное украшение.

Кондак 2

Видяще, яко неудобно есть среде соблазн и суеты мирской, в роскошных палатах царских спастися, трие фрейлины царицы Екатерины II (Саломия, Марфа и Евфросиния) тайно изыдоша из дворца (яко древле праведный Лот из Содома греховнаго), воспевая призвавшему их Господу хвалебную песнь: Аллилуия.

Икос 2

Разум богомудрый стяжав, мудрыя девы, последуя Евангельским словам Спасителя, вся Его ради оставили есте, и совлекшись риз своих многоценных, на брезе пруда оставили есте их, да забвена будет память о них. И облекшеся в нищетныя рубища, изыдоша странницы Божия, последуя Господу, не имевшему где главы приклонити; сего ради зовем ти, мати:

Радуйся, совлекшись одежд своих, ветхаго человека совлеклася еси;

радуйся, рубищным одеянием, яко ризою спасения облеклася еси.

Радуйся, для мира и лестных прелестей Его умерла еси;

радуйся, яко для вечныя жизни душею воскресла еси.

Радуйся, родителей и други оставила еси;

радуйся, яко всем сердцем Бога возлюбила еси.

Радуйся, яко сего ради сожительницею Ангелов сподобилася быти еси;

радуйся, яко в лике дев святых Царице Небесной предстоиши днесь.

Радуйся, блаженная старице Евфросиние, Колюпановская похвало и всея земли Тульския преславное украшение.

Кондак 3

Силою, данною ти свыше, блаженная, иго благое Сладчайшаго Господа нашего Иисуса Христа на ся с радостию возложила еси, и облекшись в Ангельский образ, в Серпуховской монастырь вселилася еси, выну поя с иночествующими девами Небесному Жениху Христу: Аллилуия.

Икос 3

Имущи велию любовь ко Господу, плоть свою, Евфросиние, распяла еси со страстьми и похотьми, бдением и трудами, постом и воздержанием, нестяжанием и смирением. Сего ради и вселися в тя Дух Святый, наставляя нас, грешных, ублажати тя сице:

Радуйся, яко царицу земную оставила еси;

радуйся, яко покрова Царицы Небесной сподобилася еси.

Радуйся, яко из пучины соблазн мира сего неврежденно изшла еси;

радуйся, сеть искушений бесовских, яко паучину расторгла еси.

Радуйся, смирением, яко царскою порфирою одеянная;

радуйся, благодатию Духа Святаго облагоуханная.

Радуйся, верою крепкою и живою вооруженная;

радуйся, крестным знамением и молитвою огражденная.

Радуйся, блаженная старице Евфросиние, Колюпановская похвало и всея земли Тульския преславное украшение.

Кондак 4

Буря гонений и искушений найде на тя, мати, егда игумения монастыря повелела еси убити собак, их же ты в своей хижине имела еси. Смиряя себе, с ними на голом полу возлегала еси и, наказуя себя за аромат духов во дворце, злосмрадие от них терпела еси. И покинув монастырь, исшла еси, возлагая упование свое на Бога, в скорби сердца взывая к Нему: Аллилуия.

Икос 4

Слышавши глас Апостольский: «Мы убо буи Христа ради… и аще кто мнится мудр быти в вас в веце сем, буй да бывает, яко да премудр
будет» (1 Кор. 3, 18-19), блаженная Евфросиние, высокого ума и образования, всю мудрость человеческую в ничто вменила еси, восприяв на ся юродство Христа ради, смиренно терпящи поругания и осмения людския. Изумляясь сим подвигом твоим, возглашаем ти, сия:

Радуйся, яко Апостольскому наставлению последовала еси;

радуйся,яко мудрость века сего в буйство вменила еси.

Радуйся, яко Премудрость Божию Христа возлюбила еси;

радуйся, насмешкам и поруганием людским, яко царскиим утварями себе украшала еси.

Радуйся, биение и оплевание, яко язвы Христовы на теле своем носила еси;

радуйся, яко умерщвляя тело, на локтях в нощи почивала еси.

Радуйся, яко тяжелые вериги на себе возложила еси;

радуйся, яко сим страсти плотския увядила еси.

Радуйся, блаженная старице Евфросиние, Колюпановская похвало и всея земли Тульския преславное украшение.

Кондак 5

Боготечней звезде уподобилася еда, мати честная, проходя многия веси и селения, из Серпухова в село Колюпаново близ града Алексина переселилася еси, своим благочестием и душеполезными наставлениями приводя многих ко спасению, да славится всюду имя Святыя Троицы: Отца и Сына и Святаго Духа красным пением: Аллилуия.

Икос 5

Видевше людие града Алексина и окрестностей его ангелоподобное житие блаженной старицы и благодатныя дары прозорливости и исцеления недугов, Богом ей данные, потекоша к ней со своими скорбями и нуждами, с болезнями душевными и телесными. И получив помощь, славят свою благодетельницу тако:

Радуйся, яко дар благодатный прозрения от Бога прияла еси;

радуйся, яко тем многих от пути нечестия отвратила еси.

Радуйся, целительнице язв душевных;

радуйся, врачебнице болезней телесных.

Радуйся, скорбящих утешительнице;

радуйся, о душах усопших усердная молитвеннице.

Радуйся, матерей детородящих скорое разрешение;

радуйся, детей болящих врачевание.

Радуйся, блаженная старице Евфросиние, Колюпановская похвало и всея земли Тульския преславное украшение.

Кондак 6

Проповедница Евангельских истин явилася еси блаженная, праведным житием своим показуя на себе в сии последние времена живой образ истиннаго христианства и подвижничества, поучающий и зовущий нас, грешных, оплетшихся земными пристрастиями и житейскими попечениями, взыскати спасения пути, ведущего в Царство Божие, идеже ангели и вси Святии немолчно поют Богу: Аллилуия.

Икос 6

Возсия свет Божией и спасительной благодати в душе юнаго купца, и благословением старицы Евфросинии, оставил все в мире сем, вступил в подвиг юродства Христа ради и подвижник изряден явился еси, блаженный Иоанн Тульский. Иныя же ея наставлением постригались в монашество и вселялись в святыя обители, доброй наставнице же своей благодарно взывали:

Радуйся, наставнице спасения;

радуйся, подательнице святаго благословения.

Радуйся, пред Богом о нас теплая молитвеннице;

радуйся, благочестия учительнице.

Радуйся, от козней вражиих души наши молитвою своею ограждающая;

радуйся, в добродетелех христианских преуспевати нам помогающая.

Радуйся, нечестивых вразумительнице;

радуйся, благочестивых покровительнице.

Радуйся, блаженная старице Евфросиние, Колюпановская похвало и всея земли Тулъския преславное украшение.

Кондак 7

Хотя скрыти свое духовное делание от человеческих взоров, юродствовала еси, блаженная. И часто видя ея юродство и слыша непонятные слова, глумились людие над нею. Она же, терпяще все Бога ради, благословляла имя Господне, воспевая: Аллилуия.

Икос 7

Новую благодать дарова тебе, мати, Господь: безвредно бо в зимний мраз и студень босая и в ветхои одежде ходила еси, праведнице святая, подвизая нас возглашати тебе со умилением:

Радуйся, яко естества уставы силою Божиею победила еси;

радуйся, яко зимний мраз и летний вар терпела еси.

Радуйся, яко тело свое сими подвигами духу покорила еси;

радуйся, теплотою Духа Святаго согретая.

Радуйся, пламенем любве божественныя воспламененная;

радуйся, яко многострадальным житием своим мучеником уподобилася еси.

Радуйся, яко смирением своим главу змиеву попрала еси;
радуйся, яко бесов прогонительнице явилася еси.

Радуйся, блаженная старице Евфросиние, Колюпановская похвало и всея земли Тульския преславное украшение.

Кондак 8

Странно бысть людем мирским видети старицу, главу имущу острижену, тряпицею повязану, босую, в едином капоте, вервием подпоясанну, с медным крестом на груди, с палицею в руках. И ея же не бе достоин весь мир, бесчестием и поруганием оскорбляти, не ведуще ея духовнаго совершенства, ни еже Богу пети благоразумно: Аллилуия.

Икос 8

Вся еси и всем дивна и славна явилася еси, блаженная, подобно древним святым в последняя лета сия просияла еси богоугодным житием и благодатию, данною от Бога: недуги исцеляти, будущее яко настоящее прозирати. За вся сия воспеваем ти сицевая:

Радуйся, яко научением псалмопевца Давида сна очесем своим и веждома дремания не давала еси;

радуйся, яко бодренно в полунощи Жениха Небеснаго ожидала еси.

Радуйся, яко терпением своим Иову праведному соравнялася еси;

радуйся, яко в болезни подобно Илии пророку враном питаема была еси.

Радуйся, яко преподобный Алексий, человек Божий, дом и родителей Бога ради оставила еси;

радуйся, яко блаженной Исидоре подражала еси.

Радуйся, на гноище и сметище яко блаженный Христа ради юродивый Андрей возлегала еси;

радуйся, яко подобно Василию Блаженному, зимой и летом босая ходила еси.

Радуйся, блаженная старице Евфросиние, Колюпановская похвало и всея земли Тульския преславное украшение.

Кондак 9

Всякия болезни исцеляет святый кладезь, егоже своими руками святая ископала еси близ реки Оки, говоря всем: берите воду из моего кладезя и здрави будете. Иже и доныне изливает свои студеные воды на врачевание недуг человеческих, во славу Божию и на радость православным людем, поющим о сем благодарно Богу: Аллилуия.

Икос 9

Витийство человеческое не может изрещи тесноты и величия подвига твоего, святая, так непостижимаго для нашего фарисейскаго разума, к земле приверженнаго. Един токмо Господь весть прославляти святыя своя: посему и ангелы своя в белоснежных одеяниях посла пред смертию звати тя в Небесная селения. И ныне, слыша их райское пение, преклонися милостиво и к нашим хвалениям убогим, ими же недоумевающе по достоянию восхваляти тя, зовем ти:

Радуйся, града нашего Алексина похвало и ограждение;

радуйся, прибежище наше в скорбех и в болезнех утешение.

Радуйся, яко нам, грешным, водою источника своего исцеления подавающая;

радуйся, яко чтущим память твою святую во всем помогающая.

Радуйся, яко юродством своим мудрецов века сего посрамила еси;

радуйся, яко идеалы христианского благочестия в себе воплотила еси.

Радуйся, яко имя твое между праведными и святыми почитается на земли;

радуйся, яко с ними ныне ликуеши на небеси.

Радуйся, блаженная старице Евфросиние, Колюпановская похвало и всея земли Тульския преславное украшение.

Кондак 10

Спасти хотя душу свою, трудным путем подвижничества и юродства всю свою долгую, вековую жизнь шествовала еси, мати Евфросиние, дондеже достигла еси вечнаго Небеснаго блаженства, радостно зовуще Спасителю Богу: Аллилуия.

Икос 10

Стена,ограждающая от напастей, бед и болезней, всем к помощи и заступлению твоему прибегающим явилася еси, блаженная, при жизни и по смерти. Тем же и нас, насельников града Алексина, огради предстательством своим от враг видимых и невидимых, от скорбей и болезней, зовущих ти:

Радуйся, слепым прозрение подавающая;

радуйся, хромым хождение исправляющая.

Радуйся, водами источника, кладезя своего, немощных врачующая;

радуйся, от одра болезни многих возставляющая.

Радуйся, в скорбех и обстояниях бедствующим помогающая;

радуйся, на спасения стези нас наставляющая.

Радуйся, яко и о нас, недостойных, к Богу молящаяся;

радуйся, яко и нас от искушений бесовских ходатайством своим покрываеши.

Радуйся, блаженная старице Евфросиние, Колюпановская похвало и всея земли Тульския преславное украшение.

Кондак 11

Пение благодарственное приносим Христу Богу нашему, даровавшему нам православную угодницу свою, скорую во всех скорбех помощницу и чудотворицу, поюще Ему: Аллилуия.

Икос 11

Светозарный светильник души своея имея выну горящим, мирно и тихо причастившись Пречистых Тайн Христовых, блаженная, отошла ко Господу. Небесным блаженством сиял по смерти святолепный лик старицы, и несказанное благоухание исходило от многострадальнаго тела
ея. Множество народа с любовию и слезами провожало в последний путь праведницу Божию, вопиюще:

Радуйся, самопроизвольная мученице;

радуйся, святая праведнице.

Радуйся, яко вся добрая дела своя в тайне совершала еси;

радуйся, распятием плоти, уничижением и смирением страждущему на Кресте Христу подражала еси.

Радуйся, яко в храме Царицы Небесной телом опочила еси;

радуйся, яко духом предстати Престолу Всевышняго сподобилася еси.

Радуйся, яко ныне венцем райским от Господа увенчана еси;

радуйся, и нас, почитающих тя, пред Богом помянути не забывающая.

Радуйся, блаженная старице Евфросиние, Колюпановская похвало и всея земли Тульския преславное украшение.

Кондак 12

Благодать, данную тебе от Бога, блаженная, сведуще, тебе просим и молим: не остави нас ходатайством своим, испроси нам грехов прощение, болезней исцеление, наветов вражиих прогнание, да спасшеся, прославим великое милосердие Божие, восклицая: Аллилуия.

Икос 12

Поюще дивнаго во святых своих Бога, ублажаем и свято чтим в безчисленном сонме святых Его блаженную старицу Евфросинию, прося ея молитв, помощи и благословения на вся труды и дела наша. Ты же услыши нас, мати, величающих тя сице:

Радуйся, дево святая премудрая;

радуйся, невесто Христова пречудная.

Радуйся, Божия избраннице;

радуйся, наша пред Богом предстательнице.

Радуйся, мужественно крест свой понесшая на земли;

радуйся, ныне вечно с Господом радуешися на Небеси.

Радуйся, блаженная старице, всеми любимая;

радуйся, на небеси и на земли славимая и блажимая.

Радуйся, блаженная старице Евфросиние, Колюпановская похвало и всея земли Тульския преславное украшение.

Кондак 13

О блаженная старице Евфросиние, не возгнушайся похвалами недостойными нашими, но приими малое моление сие наше и испроси у Господа вся благая на пользу душ и телес наших, да сподобимся и мы купно с тобою в вечной жизни воспевати Богу: Аллилуия.
(Этот кондак читается трижды, затем икос 1 и кондак 1)

Икос 1

Ангелом хранителем ко спасению наставляема, юная княжна Вяземская, презрев роскошь и богатство, славу и знатность и вся прелести суетнаго мира сего, оставила еси царский дворец, вступив на узкий и тернистый путь, ведущий в Царство Небесное. За сие приими от нас, блаженная, похвалы сия:

Радуйся, яко Бога ради из палат царских исшла еси;

радуйся, яко ради спасения души своея вся земная презрела еси.

Радуйся, яко самопроизвольную нищету ради Христа избрала еси;

радуйся, яко богатство нетленное и вечное обрела еси.

Радуйся, яко Небесному Жениху Христу уневестилася еси;

радуйся, яко с мудрыми девами в Чертог Его Небесный вошла еси.

Радуйся, чистая голубице Христова;

радуйся, непорочная Агнице Божия.

Радуйся, блаженная старице Евфросиние, Колюпановская похвало и всея земли Тульския преславное украшение.

Кондак 1

Избранной Богом от палат царских в Небесный Чертог Райский; блаженней старице Евфросинии, Христа ради юродивей, яко покровительнице нашей и молитвеннице похвальное принесем пение. Ты же, блаженная мати, яко имея дерзновение ко Господу, от всяких нас бед и болезней свободи, с любовию зовущих ти:

Радуйся, блаженная старице Евфросиние, Колюпановская похвало и всея земли Тульския преславное украшение.


(После акафиста читается молитва)

Молитва блаженной Евфросинии Колюпановской

«О мати блаженная Евфросиние! На земли юродивая, на небеси премудрая! Прошедши доблественно свой столетний путь земной, ныне с высоты небес призри на нас грешных в море житейском обуреваемых: от плоти — страстьми и болезнями, от мира — досаждениями и соблазнами, от диавола — многочисленными кознями, и уже близ потопления есть кораблики душ наших, не имуще крепкаго якоря веры, надежду полагающе на свои силы и человеческую помощь, с угасшим светильником любви и благочестия. Не закосни, матушка Евфросиния, помощи нам, не по достоинству нашему, но по милосердию, подобясь всемилостивому Спасу нашему Иисусу Христу. Укрепи нас с вере, надежде и любви, хладных и черствых сердцем согрей своим участием, болезни наши уврачуй, скорби и печали отыми от нас, на скользком пути сем земном подаждь нам руку помощи, да укрепившись телом и душею, с терпением крест свой понесем, с упованием на Бога и твое скорое предстательство, и да сподобимся по смерти вечныя, блаженныя жизни, славяще Отца и Сына и Свята-го Духа во веки веков. Аминь.»

Тропарь, глас 4

Вся красная мира сего призрела еси / (дворец Царский оставив), / юродство Христа ради на ся восприяла еси / блаженная мати Евфросиние. / Сего ради с мудрыми девами / в Небесный Чертог Жениха Христа вошла еси, // моляся о всех нас.

Кондак, глас 2

Премудростию Божиею наставляема, / юродивою на земле пожила еси, / мудрость века сего в буйство вменив, / венцем нетленным от Христа Бога за сие увенчалася еси, / в лики святых на Небеси водворяяся, // блаженная мати Евфросиние.


Сохранить акафист в социальных сетях:

Добавить комментарий

Ваш e-mail не будет опубликован. Обязательные поля помечены *